ചങ്ങരംകുളം: ഒരു നാടിനെ മൊത്തം ദുരിതത്തിലാക്കി ചാലിശ്ശേരി കെ.എസ്.ഇ.ബിയുടെ അലംഭാവം ജനങ്ങളെ രോഷാകുലരാക്കി. കഴിഞ്ഞദിവസം രാവിലെ മുതല്‍ ചാലിശ്ശേരി കെ.എസ്.ഇ.ബിക്ക് കീഴിലെ കോക്കൂര്‍, വളയംകുളം,ചിയ്യാനൂര്‍ അടക്കമുള്ള പല സ്ഥലങ്ങളിലും വൈദ്യുതി ബന്ധം വേര്‍പ്പെടുത്തിയിരുന്നു. വൈകിട്ടോടെ വൈദ്യുതി എത്തുമെന്ന് പ്രതീക്ഷിച്ചിരുന്ന ഉപഭോക്താക്കള്‍ക്ക് കെ.എസ്.ഇ.ബി നല്‍കിയത് എട്ടിന്റെ പണി.
രാത്രി ഏറെ വൈകിയും തകരാര്‍ പരിഹരിച്ച് വൈദ്യുതി പ്രശ്‌നം പരിഹരിക്കാന്‍ കെ.എസ്.ഇ.ബിക്ക് കഴിയാതെ വന്നതോടെ ജനങ്ങള്‍ രോഷാകുലരായിരുന്നു. വൈദ്യുതി പ്രശ്‌നത്തെ കുറിച്ച് അറിയാന്‍ ചാലിശ്ശേരി കെ.എസ്.ഇ.ബിയിലേക്ക് വിളിക്കുന്നവര്‍ക്കെല്ലാം കാലത്ത് മുതല്‍ ടെലിഫോണ്‍ സേവനം ലഭ്യമല്ല എന്ന മറുപടിയാണ് ലഭിച്ചത്. രാത്രി ഏറെ വൈകിയും വൈദ്യുതി ഇല്ലാതെ വന്നതോടെ കനത്ത ചൂടിനെ പ്രതിരോധിക്കാന്‍ കഴിയാതെ പ്രദേശവാസികള്‍ പ്രയാസത്തിലായി. പ്രദേശത്തെ വൈദ്യുതി പ്രശ്‌നം പരിഹരിക്കാതെ മണിക്കൂറുകളോളം ജനങ്ങളെ കണ്ണീര്‍ കുടിപ്പിച്ച ചാലിശ്ശേരി കെ.എസ്.ഇ.ബി ജീവനക്കാര്‍ക്കെതിരെ ജനരോഷം സോഷ്യല്‍ മീഡിയകളില്‍ കൂടി പടര്‍ന്ന് തുടങ്ങിയതോടെ രാത്രി പതിനൊന്ന് മണിയോടെ പ്രദേശത്ത് വൈദ്യുതിബന്ധം പുനസ്ഥാപിക്കുകയായിരുന്നു.