കൊണ്ടോട്ടി: കരിപ്പൂര്‍ വിമാനത്താവളത്തില്‍ വിദേശത്ത് നിന്നെത്തിയ ഒരുസ്്ത്രീ ഉള്‍പ്പടെ നാലു യാത്രക്കാരില്‍ നിന്ന് 1.005 ഗ്രാം സ്വര്‍ണം എയര്‍ കസ്റ്റംസ് ഇന്റലിജന്‍സ് വിഭാഗം പിടികൂടി. ദുബൈ,മസ്‌കത്ത്,അബൂദബി എന്നിവിടങ്ങളില്‍ നിന്ന് എത്തിയ യാത്രക്കാരില്‍ നിന്നാണ് സ്വര്‍ണം പിടിച്ചെടുത്തത്.
എയര്‍ ഇന്ത്യയുടെ വിമാനത്തില്‍ മസ്‌കത്തില്‍ നിന്നെത്തിയ മലപ്പുറം സ്വദേശി അക്ബര്‍ അലി എയര്‍ ഇന്ത്യ എക്‌സ്പ്രസിന്റെ ദുബൈ വിമാനത്തിലെത്തിയ കാസര്‍കോട് പെരുമ്പള സ്വദേശി പ്രഭാകരന്‍ എന്നിവര്‍ രാസ സംയുക്തത്തില്‍ സ്വര്‍ണം ഒളിപ്പിച്ച് ശരീരത്തില്‍ കെട്ടിവച്ചാണ് കടത്താന്‍ ശ്രമിച്ചത്. പ്രഭാകരനില്‍ നിന്ന് ലഭിച്ച 426 ഗ്രാം സംയുക്തത്തില്‍ നിന്ന് 254.77 ഗ്രാം സ്വര്‍ണമാണ് കണ്ടെടുത്തത്. ഇതിന് 7,68,132 രൂപ വിലവരും.അക്ബറലിയുടെ ശരീരത്തില്‍ നിന്ന് ലഭിച്ച 761 ഗ്രാം സംയുക്തത്തില്‍ നിന്ന് 298.3 ഗ്രാം സ്വര്‍ണമാണ് ലഭിച്ചത്. ഇതിന് 8,99,525 രൂപ വിലവരും.
അബൂദാബിയില്‍ നിന്നെത്തിയ കോഴിക്കോട് സ്വദേശി ജാബിര്‍, മലപ്പുറം സ്വദേശിനി മുര്‍ഷിദ എന്നിവരില്‍ നിന്ന് ആഭരണ രൂപത്തിലുള്ള സ്വര്‍ണമാണ് കണ്ടെടുത്തത്. ജാബിര്‍ ശരീരത്തില്‍ ഒളിപ്പിച്ചു കടത്തിയ 100 ഗ്രാം വരുന്ന സ്വര്‍ണ മാലക്ക് ഇന്ത്യന്‍ വിപണിയില്‍ 3,01,500 രൂപയും മുര്‍ഷിദയുടെ കൈവശമുണ്ടായിരുന്ന 325 ഗ്രാം വരുന്ന വളകള്‍ക്കും മാലകള്‍ക്കും കൂടി 10,61280 രൂപ വിലയും ലഭിക്കും.
രഹസ്യ വിവരം ലഭിച്ചതനുസരിച്ച് കസ്റ്റംസ് ഇന്റലിജന്‍സ് വിഭാഗം ഇവരെ പിടികൂടി ചോദ്യം ചെയ്യുകയായിരുന്നു.