തൊടുപുഴ: കൊട്ടാരക്കര- ഡിണ്ടുക്കല്‍ ദേശീയപാതയില്‍ ലോറി മറിഞ്ഞ് ഡ്രൈവര്‍ മരിച്ചു. ഒരാള്‍ക്കായി തിരച്ചില്‍ തുടരുന്നു. രാജസ്ഥാന്‍ ഭരത്പൂര്‍ ജില്ലയിലെ ഉഞ്ചേര സ്വദേശി അലീം (23) ആണ് മരിച്ചത്. ഇയാളോടൊപ്പം ഉണ്ടായിരുന്ന രാജസ്ഥാന്‍ സ്വദേശി ലിസ്തത്തിന് വേണ്ടിയുള്ള തിരച്ചില്‍ പൊലിസും നാട്ടുകാരും തുടരുകയാണ്.
കേരളാ-തമിഴ്‌നാട് അതിര്‍ത്തിയില്‍ കുമളിക്ക് സമീപം ഇരച്ചില്‍പ്പാലത്താണ് ലോറി അപകടത്തില്‍പ്പെട്ടത്. ഇന്നലെ രാവിലെ ആറോടെയാണു സംഭവം.
കാഞ്ഞിരപ്പള്ളിയില്‍നിന്ന് ചക്ക കയറ്റി ബംഗളൂരുവിലേക്ക് പോയ ലോറിയാണ് അപകടത്തില്‍പ്പെട്ടത്. ഇരച്ചില്‍പാലത്തിന് സമീപത്തുള്ള കൊടുംവളവില്‍നിന്ന് അഞ്ഞൂറോളം അടി താഴ്ചയിലേക്കാണ് ലോറി മറിഞ്ഞത്. പിന്നാലെയെത്തിയ വാഹനത്തിലുള്ളവര്‍ അറിയിച്ചതനുസരിച്ച് ലോവര്‍ക്യാംപില്‍നിന്ന് പൊലിസും നാട്ടുകാരും എത്തി നടത്തിയ തിരച്ചിലിലാണ് അലീമിനെ കണ്ടെത്തിയത്. ഇയാളെ റോഡില്‍ എത്തിച്ചപ്പോഴേക്കും മരിച്ചിരുന്നു.