ആദ്യ പാദ പോരാട്ടത്തില്‍ 5-0ത്തിന്റെ വിജയം സ്വന്തമാക്കി വേവലാതികളില്ലാതെ എവേ പോരാട്ടത്തിനായി ബെസിക്റ്റസിന്റെ തട്ടകത്തിലെത്തിയ ബയേണ്‍ തുടക്കത്തില്‍ വല ചലിപ്പിച്ച് നില ഭദ്രമാക്കി.
കളി തുടങ്ങി 18ാം മിനുട്ടില്‍ തിയാഗോ അല്‍ക്കന്താരയാണ് ബയേണിന് ലീഡ് സമ്മാനിച്ചത്. പിന്നീട് രണ്ടാം പകുതിയുടെ തുടക്കത്തില്‍ തന്നെ ബെസിക്റ്റസ് താരം ഗൊഖന്‍ ഗോനുലിന്റെ അബദ്ധം സെല്‍ഫ് ഗോള്‍ രൂപത്തില്‍ എത്തിയതോടെ ബയേണിന് അധ്വാനിക്കാതെ തന്നെ രണ്ടാം ഗോളും ലഭിച്ചു.
59ാം മിനുട്ടില്‍ വാഗ്നര്‍ ലൗ ബെസിക്റ്റസിന്റെ ആശ്വാസ ഗോള്‍ വലയിലാക്കിയെങ്കിലും അവരുടെ തിരിച്ചുവരവ് പ്രതീക്ഷകള്‍ അപ്പോഴേക്കും വിദൂരമായി കഴിഞ്ഞിരുന്നു. ലെവന്‍ഡോസ്‌കിക്ക് പകരം സാന്‍ഡ്രോ വാഗ്നറെ കളത്തിലിറക്കി ജുപ് ഹെയ്‌നക്‌സ് നടത്തിയ നീക്കം ഫലം കണ്ടു. ഇറങ്ങി അധികം താമസിയാതെ ഡേവിഡ് അലാബ നല്‍കിയ ക്രോസ് നെഞ്ച് കൊണ്ട് അനായാസം വലയിലാക്കി വാഗ്നര്‍ ബയേണിന്റെ പട്ടിക തികച്ചു. ബയേണിനെതിരേ സ്വന്തം തട്ടകത്തില്‍ മികച്ച പോരാട്ടം പുറത്തെടുക്കാന്‍ ബെസിക്റ്റസിന് സാധിച്ചു.