തിരുവനന്തപുരം: ഭരണപക്ഷ യൂണിയനായ കെ.എസ്.ആര്‍.ടി.എയുടെ സമ്മര്‍ദത്തിനു വഴങ്ങി മുന്‍ തീരുമാനങ്ങളില്‍ മാറ്റം വരുത്താന്‍ കെ.എസ്.അര്‍.ടി.സി. മാനേജ്‌മെന്റ് തീരുമാനിച്ചു. സി.ഐ.ടി.യു അനുകൂല സംഘടനയായ കെ.എസ്.ആര്‍.ടി.എ മുന്നോട്ടുവച്ച എല്ലാ ആവശ്യങ്ങളും അംഗീകരിക്കാമെന്ന് തൊഴിലാളികളുടെ പ്രതിനിധിയായി ചര്‍ച്ചക്കെത്തിയ സി.ഐ.ടി.യു സംസ്ഥാന പ്രസിഡന്റ് ആനത്തലവട്ടം ആനന്ദന് ഗതാഗത മന്ത്രി എ.കെ.ശശീന്ദ്രന്റെ സാന്നിധ്യത്തില്‍ കെ.എസ്.ആര്‍.ടി.സിക്കുവേണ്ടി ഹാജരായ ചീഫ് ഫിനാന്‍ഷ്യല്‍ അഡൈ്വസര്‍ ഉറപ്പുനല്‍കി. ഇതോടെ കെ.എസ്.ആര്‍.ടി.എയുടെ നേതൃത്വത്തില്‍ കെ.എസ്.ആര്‍.ടി.സി ആസ്ഥാനത്തിനു മുന്നില്‍ കഴിഞ്ഞ ആറാം തിയതി മുതല്‍ നടത്തിവന്ന അനിശ്ചിതകാല നിരാഹാര സമരം പിന്‍വലിച്ചു.
ഡ്യൂട്ടി പരിഷ്‌കരണം ഉള്‍പ്പെടെയുള്ള എന്തു നടപടികള്‍ സ്വീകരിക്കുന്നതും യൂനിയനുകളുമായി ചര്‍ച്ച ചെയ്തതിനു ശേഷം മാത്രമായിരിക്കുമെന്ന് മാനേജ്‌മെന്റ് ഉറപ്പു നല്‍കിയിട്ടുണ്ട്. സുശീല്‍ഖന്ന റിപ്പോര്‍ട്ടില്‍ പറഞ്ഞിരിക്കുന്നതുപോലെ അടുത്ത മാസം തന്നെ മൂന്നു സോണുകളായി തിരിച്ച് എക്‌സിക്യൂട്ടീവ് ഡയരക്ടര്‍മാര്‍ക്ക് ചുമതല നല്‍കും. എം.പാനല്‍ ജീവനക്കാരുടെ വേതനം 50 രൂപ വര്‍ധിപ്പിക്കാനും ശമ്പള പരിഷ്‌കരണ ചര്‍ച്ചകള്‍ ഏപ്രില്‍ മാസത്തില്‍തന്നെ ആരംഭിക്കാനും ചര്‍ച്ചയില്‍ ധാരണയായി.