തളിപ്പറമ്പ്: തൃച്ചംബരം ശ്രീകൃഷ്ണ ക്ഷേത്രോത്സവ സമാപന ചടങ്ങിനിടെ മതില്‍ തകര്‍ന്നു വീണ് നാലുപേര്‍ക്ക് പരുക്കേറ്റു. തൃച്ചംബരത്തെ പി.വി ശാരദ(60), സഹോദരി ശോഭന(58) എന്നിവരെ ലൂര്‍ദ്ദ് ആശുപത്രിയിലും പ്ലാത്തോട്ടത്തെ ടി. അംബിക(45), ഏഴാംമൈലിലെ ടി.കെ ശകുന്തള(65) എന്നിവരെ സഹകരണ ആശുപത്രിയിലും പ്രവേശിപ്പിച്ചു. കൂടിപ്പിരിയല്‍ കഴിഞ്ഞ് ആളുകള്‍ പിരിഞ്ഞുപോകുന്നതിനിടയിലാണ് പൂന്തുരുത്തി തോടിന് സമീപത്തെ പഴക്കം ചെന്ന മതില്‍ തകര്‍ന്നുവീണത്. നൂറുകണക്കിന് സ്ത്രീകളും കുട്ടികളും നടന്നുപോകുന്നതിനിടയിലേക്കാണ് ചെങ്കല്ലില്‍ പണിത മതില്‍ വീണത്. ആളുകള്‍ പെട്ടെന്ന് ഓടിമാറിയതിനാലാണ് വന്‍ദുരന്തം ഒഴിവായത്. തളിപ്പറമ്പില്‍ നിന്നെത്തിയ അഗ്‌നിശമനസേനയും പൊലിസും ചേര്‍ന്നാണ് മതിലിനിടയില്‍ കുടുങ്ങിയവരെ പുറത്തെടുത്ത് ആശുപത്രിയിലെത്തിച്ചത്. ആരുടെയും പരുക്ക് ഗുരുതരമല്ല.