ഗാന്ധിനഗർ:വീട്ടമ്മയുടെ മരണത്തിൽ വിവാദമായി ആശുപത്രി സൂപ്രണ്ടിൻ്റെ പ്രതികരണം. മന്ത്രിമാരുമായി ചേർന്ന് നടത്തിയ വാർത്താസമ്മേളനത്തിലെ "എല്ലായിടത്തും എപ്പോഴും ചെന്ന് നോക്കാൻ പറ്റില്ല"എന്ന   പ്രതികരണമാണ് വിമർശനത്തിന് വിധേയമായത്.  ബലക്ഷയം കണ്ടതിനെ തുടർന്ന് ശുചിമുറികൾ അടച്ചിട്ടിരുന്നതാണെന്ന് സൂപ്രണ്ട് ഡോ.പി.കെ ജയകുമാർ പറഞ്ഞു. 
പ്രവേശനമില്ലെങ്കിൽ പിന്നെ ബിന്ദു അടക്കമുള്ളവർ എങ്ങനെ അവിടെ  എത്തി എന്ന ചോദ്യത്തോടാണ് ഇങ്ങനെ അദ്ദേഹം പ്രതികരിച്ചത്.

ALSO READ: കോട്ടയം മെഡിക്കൽ കോളേജ് കെട്ടിടം തകർന്ന സംഭവം: ബലക്ഷയം നേരത്തെ ശ്രദ്ധയിൽപ്പെട്ടിരുന്നുവെന്ന് സൂപ്രണ്ട്, അപകട ഉത്തരവാദിത്തം ഏറ്റെടുത്തു

സൂപ്രണ്ട് തന്നെ ഇങ്ങനെ പ്രതികരിച്ചത് അനുചിതമായെന്നാണ് വിലയിരുത്തൽ. ദൈനംദിന കാര്യങ്ങൾ അറിയാനുള്ള സംവിധാനങ്ങൾ പ്രവർത്തിക്കുന്നില്ലെന്നും അത് സൂപ്രണ്ട് അറിയുന്നില്ലെന്നുമാണ് ആക്ഷേപം. അവിടേക്ക് ആരെങ്കിലും പ്രവേശിക്കുന്നുണ്ടോ എന്ന് പരിശോധിക്കാൻ ഹെഡ് നഴ്സിനെയാണ് ചുമതലപ്പെടുത്തിയത് എന്നും അദ്ദേഹം പറഞ്ഞു. രോഗികളെ നിർബന്ധിച്ച് ഡിസ്ചാർജ് ചെയ്യിക്കാൻ ശ്രമിച്ചെന്ന പരാതി അടിസ്ഥാനരഹിതമാണ്. അങ്ങനെ ഉണ്ടായാൽ കർശന നടപടി ഉണ്ടാകും. രോഗികളെ മാറ്റുന്ന നടപടി ഇന്നുതന്നെ തുടങ്ങുമെന്നും അദ്ദേഹം വ്യക്തമാക്കി.