തിരുവനന്തപുരം: വിഴിഞ്ഞം തുറമുഖ പദ്ധതിയുടെ നിര്‍മ്മാണം സമയബന്ധിതമായി പൂര്‍ത്തിയാക്കാനാകുമെന്നാണ് സര്‍ക്കാര്‍ പ്രതീക്ഷയെന്ന് തുറമുഖ വകുപ്പ് മന്ത്രി കടന്നപ്പള്ളി രാമചന്ദ്രന്‍ നിയമസഭയെ അറിയിച്ചു. പദ്ധതി നടത്തിപ്പില്‍ വീഴ്ച്ച വരുത്തിയാല്‍ അദാനിയില്‍ നിന്നും പിഴ ഈടാക്കുമെന്നും അദ്ദേഹം പറഞ്ഞു. വിഴിഞ്ഞം പദ്ധതി വൈകുന്നത് ചൂണ്ടിക്കാട്ടി എം.വിന്‍സെന്റ് എം.എല്‍.എ കൊണ്ടുവന്ന അടിയന്തര പ്രമേയ നോട്ടിസിന് മറുപടി പറയുകയായിരുന്നു മന്ത്രി.

ഓഖി ദുരന്തം തുറമുഖത്തിന്റെ നിര്‍മ്മാണ പ്രവര്‍ത്തനത്തെ ബാധിച്ചുവെന്ന് മന്ത്രി പറഞ്ഞു. ഓഖിയെ തുടര്‍ന്ന് ഡ്രജ്ജറുകള്‍ക്കും പുലിമുട്ടിനും കേടുപാടുകള്‍ സംഭവിച്ചു. പാറയുടെ പ്രശ്‌നത്തില്‍ ഇടപെടാന്‍ സര്‍ക്കാരിന് പരിമിതിയുണ്ടെന്നും അദ്ദേഹം വ്യക്തമാക്കി.

അതേസമയം, വിഴിഞ്ഞം പദ്ധതി കാലാവധി നീട്ടാനും നഷ്ടപരിഹാരത്തില്‍ നിന്ന് അദാനിയെ ഒഴിവാക്കാനും ഗൂഢ നീക്കം നടക്കുന്നുവെന്ന് പ്രതിപക്ഷം ആരോപിച്ചു. അദാനിക്ക് ലാഭമുണ്ടാക്കാന്‍ സര്‍ക്കാര്‍ നിന്ന് കൊടുക്കേണ്ടെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു.

ലൈറ്റ് മെട്രോയില്‍ നിന്ന് ഇ.ശ്രീധരനെ ഓടിച്ചു വിട്ട പോലെ വിഴിഞ്ഞം പദ്ധതി വെള്ളത്തിലാക്കാനാണ് സര്‍ക്കാരിന്റെ ശ്രമം തീര്‍ത്തും ലാഘവത്തോടെയാണ് മന്ത്രി കാര്യങ്ങള്‍ കാണുന്നതെന്നും പ്രതിപക്ഷനേതാവ് കുറ്റപ്പെടുത്തി.