കാഞ്ഞങ്ങാട്: സംസ്ഥാന പോളിടെക്‌നിക് കലോത്സവത്തില്‍ കോഴിക്കോട് പോളി മുന്നിട്ടുനില്‍ക്കുന്നു. 17 മത്സരങ്ങള്‍ പൂര്‍ത്തിയായപ്പോള്‍ 51 പോയിന്റ് നേടിയാണ് കോഴിക്കോട് മുന്നിട്ടുനില്‍ക്കുന്നത്. 50 പോയിന്റ് നേടി പെരിന്തല്‍മണ്ണ ഗവ. പോളി രണ്ടാംസ്ഥാനത്തും 47 പോയിന്റ് വീതം നേടി കണ്ണൂര്‍, തൃക്കരിപ്പൂര്‍ ഗവ.പോളിടെക്‌നിക് കോളജുകള്‍ മൂന്നാംസ്ഥാനത്തും നിലയുറപ്പിച്ചിട്ടുണ്ട്.
സ്റ്റേജിന മത്സരങ്ങള്‍ ഇന്ന് വൈകിട്ട് 5ന് ഫോക്‌ലോര്‍ അക്കാദമി വൈസ് ചെയര്‍മാനും മാപ്പിളപ്പാട്ട് കലാകാരനുമായ എരഞ്ഞോളി മൂസയും ചലച്ചിത്ര പിന്നണി ഗായകന്‍ കാഞ്ഞങ്ങാട് രാമചന്ദ്രനുംചേര്‍ന്ന് ഭദ്രദീപം കൊളുത്തി ഉദ്ഘാടനം ചെയ്യും. സംഘാടകസമിതി വര്‍ക്കിങ് ചെയര്‍മാന്‍ വി.വി രമേശന്‍ അധ്യക്ഷനാവും. 25ന് വൈകിട്ട് കലോല്‍സവ സമാപന സമ്മേളനവും ഉപഹാര വിതരണവും നടക്കും. ചലച്ചിത്രതാരം മണികണ്ഠണ്‍ മുഖ്യാതിഥിയാകും. സംസ്ഥാനത്തെ 66 പോളിടെക്‌നിക് കോളേജുകളില്‍ നിന്നായി 6,107 കലാകാരന്മാരാണ് കലോല്‍സവത്തില്‍ മാറ്റുരക്കുന്നത്.