പാനൂര്‍: വള്ള്യായിയില്‍ ആളൊഴിഞ്ഞ പറമ്പില്‍ ജെ.സി.ബി ഉപയോഗിച്ച് ശുചീകരണ പ്രവര്‍ത്തനം നടത്തുന്നതിനിടെ സ്‌ഫോടനം. ഇന്നലെ രാവിലെ 9.45ഓടെ സ്റ്റീല്‍ ബോംബാണ് ഉഗ്രശബ്ദത്തില്‍ പൊട്ടിത്തെറിച്ചത്. ആര്‍ക്കും പരുക്കില്ല. കെ. പത്മജന്റെ ഉടമസ്ഥതയിലുള്ള സ്ഥലത്തായിരുന്നു സ്‌ഫോടനം. സ്‌ഫോടന ശബ്ദം ഏറെ ദൂരെ വരെ കേട്ടതായി നാട്ടുകാര്‍ പറഞ്ഞു. രണ്ട് സ്ത്രീ തൊഴിലാളികള്‍ അടുത്തുതന്നെ ഉണ്ടായിരുന്നെങ്കിലും ഇവര്‍ പരുക്കേല്‍ക്കാതെ രക്ഷപെടുകയായിരുന്നു. പാനൂര്‍ സി.ഐ വി.വി ബെന്നിയുടെ നേതൃത്വത്തില്‍ പൊലിസ് സ്ഥലത്തെത്തി പരിശോധന നടത്തി. സി.ഐയുടെ നേതൃത്വത്തില്‍ മേഖലയില്‍ സമാധാന പ്രവര്‍ത്തനങ്ങള്‍ ഊര്‍ജിതമായി നടക്കുന്നതിനിടെയാണ് സൂക്ഷിച്ചുവച്ച ബോംബ് പൊട്ടിത്തെറിച്ചത്.