മുംബൈ: വനിതാ ത്രിരാഷ്ട്ര ടി20 പോരാട്ടത്തില്‍ ഇന്ത്യക്ക് തുടര്‍ച്ചയായ മൂന്നാം തോല്‍വി. ആസ്‌ത്രേലിയന്‍ വനിതകള്‍ ഇന്ത്യയെ 36 റണ്‍സിന് കീഴടക്കി. തോല്‍വിയോടെ ഇന്ത്യ പരമ്പരയില്‍ നിന്ന് പുറത്തായി.
ആദ്യം ബാറ്റ് ചെയ്ത ആസ്‌ത്രേലിയ നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 186 റണ്‍സെന്ന മികച്ച സ്‌കോര്‍ സ്വന്തമാക്കിയപ്പോള്‍ ഇന്ത്യയുടെ മറുപടി 20 ഓവറില്‍ അഞ്ച് വിക്കറ്റ് നഷ്ടത്തില്‍ 150 റണ്‍സില്‍ അവസാനിച്ചു.
ഇന്ത്യക്കായി ഓപണര്‍ ജെമിമ റോഡ്രിഗസ് കന്നി ടി20 അര്‍ധ സെഞ്ച്വറി നേടി ടോപ് സ്‌കോററായി. താരം 50 റണ്‍സെടുത്തു.
മധ്യനിരയില്‍ ക്യാപ്റ്റന്‍ ഹര്‍മന്‍പ്രീത് കൗര്‍ (33), അനുജ പാട്ടീല്‍ (പുറത്താകാതെ 38), പൂജ വസ്ത്രകര്‍ (പുറത്താകാതെ 19) എന്നിവരും ഭേദപ്പെട്ട പ്രകടനം പുറത്തെടുത്തെങ്കിലും വിജയത്തിലെത്തിക്കാന്‍ ഇവര്‍ക്കൊന്നും സാധിച്ചില്ല.
മുന്‍നിര താരങ്ങളായ സ്മൃതി മന്ധന മൂന്ന് റണ്ണിനും മിതാലി രാജ് പൂജ്യത്തിലും പുറത്തായത് ഇന്ത്യക്ക് തിരിച്ചടിയായി മാറി.
നേരത്തെ ടോസ് നേടി ഇന്ത്യ ആസ്‌ത്രേലിയയെ ബാറ്റിങിനയക്കുകയായിരുന്നു.
ബെത് മൂണി (71), എലിസെ വില്ലനി (61) എന്നിവരുടെ മികച്ച ബാറ്റിങാണ് ഓസീസിന് പൊരുതാവുന്ന സ്‌കോര്‍ സമ്മാനിച്ചത്.
ഇന്ത്യക്കായി പൂജ വസ്ത്രകര്‍ രണ്ട് വിക്കറ്റെടുത്തു. നാളെ ആസ്‌ത്രേലിയ-ഇംഗ്ലണ്ട് പോരാട്ടവും ഈ മാസം 29ന് നടക്കുന്ന അവസാന മത്സരത്തില്‍ ഇന്ത്യ ഇംഗ്ലണ്ടുമായും ഏറ്റുമുട്ടും. ആസ്‌ത്രേലിയ-ഇംഗ്ലണ്ട് ഫൈനല്‍ മത്സരം 31ന് അരങ്ങേറും.