കോഴിക്കോട്: ഇടിയങ്ങര ശൈഖ് പള്ളിയിലെ 459-ാം അപ്പവാണിഭ നേര്‍ച്ചക്ക് ഇന്ന് കൊടിയേറും. രാവിലെ ഒന്‍പതിന് മഖാം അങ്കണത്തില്‍ സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ കൊടി ഉയര്‍ത്തുതോടെ പ്രധാന നേര്‍ച്ചാപരിപാടികള്‍ക്ക് സമാരംഭം കുറിക്കും.
ജാമിഅ ദാറുസ്സലാം പ്രിന്‍സിപ്പല്‍ മൂസക്കുട്ടി ഹസ്രത്തിന്റെ അധ്യക്ഷതയില്‍ നടക്കുന്ന പണ്ഡിതസംഗമം സമസ്ത കേരള ജംഇയ്യത്തുല്‍ ഉലമ ജന.സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. സമസ്ത വിദ്യാഭ്യാസ ബോര്‍ഡ് ജന.സെക്രട്ടറി എം.ടി.അബ്ദുല്ല മുസ്‌ലിയാര്‍ മുഖ്യപ്രഭാഷണം നടത്തും.
അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍, ചേലക്കാട് മുഹമ്മദ് മുസ്‌ലിയാര്‍, എ.വി.അബ്ദുറഹ്മാന്‍ മുസ്‌ലിയാര്‍, ഉമര്‍ ഫൈസി മുക്കം, ഇ.കെ.അബൂബക്കര്‍ മുസ്‌ലിയാര്‍ മൊറയൂര്‍, ഹംസക്കുട്ടി മുസ്‌ലിയാര്‍ ആദൃശ്ശേരി, അബ്ദുല്‍ ഗഫൂര്‍ ഹൈതമി നരിപ്പറ്റ, അബ്ദുല്‍ ജലീല്‍ ഫൈസി വെളിമുക്ക്, എം.പി.തഖിയ്യുദ്ദീന്‍ ഹൈതമി, അബ്ദുല്‍ ഖാദിര്‍ ഖാസിമി മാണിയൂര്‍, സി.കെ.മൊയ്തീന്‍കുട്ടി ഫൈസി പന്തല്ലൂര്‍, ആര്‍.വി.കുട്ടിഹസന്‍ ദാരിമി, എം.സി.മായന്‍ ഹാജി, എന്‍ജി.പി.മാമുക്കോയ ഹാജി, പി.ടി.മമ്മദ്‌കോയ ഹാജി എവറസ്റ്റ്, മുക്കം മോയിമോന്‍ ഹാജി, ചെമ്മുക്കന്‍ കുഞ്ഞാപ്പു ഹാജി, പി.വി.മഹ്മൂദ് ഹാജി, അബ്ദുല്‍ ഗഫൂര്‍ ദാരിമി മുണ്ടക്കുളം, മുഹമ്മദ് കുട്ടി ദാരിമി കോടങ്ങാട് സംബന്ധിക്കും.
ഇന്നലെ നടന്ന മജ്‌ലിസുന്നൂര്‍ ആത്മീയ സംഗമത്തിന് സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കി. ഹസന്‍ സഖാഫി പൂക്കോട്ടൂര്‍ പ്രഭാഷണം നടത്തി.