ന്യൂഡല്‍ഹി: കേന്ദ്ര സര്‍ക്കാരിനെ പ്രതിക്കൂട്ടിലാക്കി വീണ്ടും ബി.ജെ.പി നേതാവ് സുബ്രഹ്്മണ്യന്‍ സാമി. എയര്‍ ഇന്ത്യയെ സ്വകാര്യവല്‍ക്കരിക്കാനുള്ള കേന്ദ്ര സര്‍ക്കാര്‍ തീരുമാനത്തെയാണ് അദ്ദേഹം ഇത്തവണ വിമര്‍ശിച്ചത്. വിമാനക്കമ്പനിയുടെ സ്വകാര്യവല്‍ക്കരണം മറ്റൊരു അഴിമതിക്കാണ് വഴിവയ്ക്കുന്നതെന്നാണ് അദ്ദേഹം ഇന്നലെ ഡല്‍ഹിയില്‍ പറഞ്ഞത്. ട്വിറ്ററിലൂടെയാണ് അദ്ദേഹം കേന്ദ്ര സര്‍ക്കാരിനെതിരേ വിമര്‍ശനം ഉന്നയിച്ചത്. എയര്‍ ഇന്ത്യയെ രാജ്യത്തിന്റെ ഫാമിലി സില്‍വര്‍ എന്ന് വിശേഷിപ്പിച്ച അദ്ദേഹം ഇതിന്റെ ഓഹരികള്‍ വിറ്റൊഴിക്കലല്ലെന്നും വില്‍പനയില്‍കൂടി മറ്റൊരു അഴിമതി ഉണ്ടാക്കുകയാണെന്നുമാണ് അഭിപ്രായപ്പെട്ടത്.
എയര്‍ ഇന്ത്യയുടെ ഓഹരി വില്‍പന സംബന്ധിച്ച് നിരീക്ഷിച്ചുകൊണ്ടിരിക്കുകയാണെന്നും ക്രമക്കേട് കണ്ടാല്‍ കോടതിയെ സമീപിക്കുമെന്നും അദ്ദേഹം പറഞ്ഞു. പ്രതിപക്ഷ പാര്‍ട്ടികളുടെ എതിര്‍പ്പ് അവഗണിച്ച് വിമാന കമ്പനിയുടെ 76 ശതമാനം ഓഹരികളും കൈയൊഴിയാന്‍ തീരുമാനിച്ചത്. ഇതിനിടയിലാണ് ബി.ജെ.പിയില്‍ നിന്നുതന്നെ വിമത ശബ്ദം ഉയര്‍ന്നത്.