ഭുവനേശ്വര്‍: ത്രില്ലര്‍ പോരാട്ടത്തില്‍ ഐ.എസ്.എല്‍ ടീം എഫ്.സി പൂനെ സിറ്റിയെ വീഴ്ത്തി ഐ ലീഗ് ടീം ഷില്ലോങ് ലജോങ് ഇന്ത്യന്‍ സൂപ്പര്‍ കപ്പ് ഫുട്‌ബോളിന്റെ ക്വാര്‍ട്ടറിലേക്ക് കടന്നു. രണ്ടിനെതിരേ മൂന്ന് ഗോളുകള്‍ക്കാണ് ലജോങിന്റെ തകര്‍പ്പന്‍ ജയം. രണ്ട് ഗോളിന് പിന്നില്‍ നിന്ന ശേഷമാണ് ലജോങ് കരുത്തോടെ തിരിച്ചടിച്ച് മത്സരം വരുതിയിലാക്കിയത്.
കളിയുടെ 17ാം മിനുട്ടില്‍ ലഭിച്ച ഫ്രീ കിക്ക് ഗോളിലേക്ക് തിരിച്ചുവിട്ട് ലുക്ക പൂനെയെ മുന്നില്‍ കടത്തി. 22ാം മിനുട്ടില്‍  നേടിയ ഗോളിലൂടെ മാഴ്‌സലീഞ്ഞോ പൂനെയുടെ ലീഡുയര്‍ത്തി. എന്നാല്‍ പതിയെ മത്സരത്തിലേക്ക് തിരിച്ചെത്തിയ ഷില്ലോങ് ലജോങ് 29ാം മിനുട്ടില്‍ ലീഡ് കുറച്ചു. അബ്ദുലായെ കോഫിയാണ് ലജോങിനായി ഗോള്‍ മടക്കിയത്. രണ്ടാം പകുതിയിലേക്ക് കടന്ന പോരാട്ടത്തിന്റെ 61ാം മിനുട്ടില്‍ ലജോങ് സമനില പിടിച്ചു. രാകേഷ് പ്രദാനാണ് ടീമിനെ ഒപ്പമെത്തിച്ചത്.
മത്സരം നിശ്ചിത സമയം കഴിഞ്ഞ് അധിക സമയത്തേക്ക് കടക്കുമെന്ന പ്രതീതി നില്‍ക്കേയാണ് ലജോങിന് അനുകൂലമായി പെനാല്‍റ്റി ലഭിച്ചത്. ലജോങ് താരം കോഫിയെ പൂനെ ഗോള്‍ കീപ്പര്‍ വിശാല്‍ കെയ്ത് ഫൗള്‍ ചെയ്തതിനെ തുടര്‍ന്നാണ് അവര്‍ക്ക് പെനാല്‍റ്റി ലഭിച്ചത്. കിക്കെടുത്ത സാമുവല്‍ ലാല്‍മുവാന്‍പുയ ലക്ഷ്യം കണ്ടതോടെ ലജോങ് മുന്നിലെത്തി. കളിയുടെ അവസാന നിമിഷത്തില്‍ രണ്ടാം മഞ്ഞ കാര്‍ഡ് കണ്ട് ചുവപ്പ് വാങ്ങി മാഴ്‌സലീഞ്ഞോ കളം വിട്ടതോടെ ലോങ് വിസില്‍ മുഴങ്ങുമ്പോള്‍ പൂനെ പത്ത് പേരായി ചുരുങ്ങിയിരുന്നു. ഈ മാസം 11ന് നടക്കുന്ന ക്വാര്‍ട്ടറില്‍ മോഹന്‍ ബഗാനാണ് ഷില്ലോങ് ലജോങിന്റെ എതിരാളി.