തലശ്ശേരി: കേരള പൊലിസിന് അഭിമാനമായി തലശ്ശേരി ജനമൈത്രി പൊലിസ് കേന്ദ്രം. കഴിഞ്ഞ അഞ്ചര വര്‍ഷത്തിലേറെയായി തലശ്ശേരി ജനമൈത്രി പൊലിസ് നടത്തിവരുന്ന സൗജന്യ പി.എസ്.സി പരിശീലന കേന്ദ്രത്തില്‍നിന്നു ഇപ്പോള്‍ പുറത്തുവന്ന എല്‍.ഡി.സി റാങ്ക് ലിസ്റ്റില്‍ നിരവധി പേരാണ് ഉള്‍പ്പെട്ടത്. ആദ്യ 50 റാങ്കുകളില്‍ തന്നെ 7,9,16,48 എന്നിവ ജനമൈത്രി പൊലിസിന്റെ പരിശീലന കേന്ദ്രത്തിലെ ഉദ്യോഗാര്‍ഥികള്‍ക്കാണെന്നത് അഭിമാനമായി. പലതിലും മുപ്പതിലധികം പേര്‍ മെയിന്‍ ലിസ്റ്റിലും ഉള്‍പ്പെട്ടു. 12 പേര്‍ക്ക് വിവിധ ഡിപ്പാര്‍ട്ടുമെന്റുകളിലായി ജോലിയും ലഭിച്ചു. ഇതില്‍ ഒരാള്‍ വനിതാ പൊലിസാണെന്നതാണ് ഏറെ പ്രത്യേകത. ചൊവ്വ, വ്യാഴം, ശനി, ഞായര്‍ ദിവസങ്ങളില്‍ രാവിലെ 9.30 മുതല്‍ ഉച്ചക്ക് 1.30 വരെയാണ് എ.എസ്.പി ഓഫിസ് കോംപൗണ്ടിലെ കെട്ടിടത്തില്‍ പരിശീലനം. വിദ്യാര്‍ഥികള്‍ക്കാവശ്യമായ എല്ലാ ആനുകാലിക പ്രസിദ്ധീകരണങ്ങളും ഇവിടെയുണ്ട്. ജില്ലാ പൊലിസ് ചീഫ് ജി. ശിവവിക്രത്തിന്റെയും തലശ്ശേരി എ.എസ്.പി ചൈത്ര തേരേസാ ജോണിന്റെയും നേതൃത്വത്തില്‍ തലശ്ശേരി സി.ഐ കെ.ഇ പ്രേമചന്ദ്രന്‍, എസ്.ഐ അനില്‍കുമാര്‍, സി.ആര്‍.ഒ നജീബ് എന്നിവരാണ് ക്ലാസുകള്‍ നിയന്ത്രിക്കുന്നത്. സേവനതല്‍പരരായ ഒരുപറ്റം അധ്യാപകരുടെ ആത്മസമര്‍പ്പണവും കഠിനാധ്വാനവുമാണ് പരിശീലന പരിപാടിയുടെ വിജയത്തിന് ആധാരം.