ചെന്നൈ: കാവേരി വിഷയത്തില്‍ തമിഴ്‌നാട്ടില്‍ പ്രക്ഷോഭം തുടരുമ്പോള്‍ ഐ.പി.എല്ലിനെതിരേ ശക്തമായ നിലപാടുമായി തെന്നിന്ത്യന്‍ ചലച്ചിത്ര താരം രജിനികാന്ത്. ചെന്നൈയില്‍ ഐ.പി.എല്‍ ക്രിക്കറ്റ് മത്സരം സംഘടിപ്പിക്കേണ്ട സമയമല്ല ഇതെന്നും കാവേരി വിഷയത്തില്‍ പ്രതിഷേധം ഐ.പി.എല്‍ വേദിയിലുണ്ടാവുമെന്നും രജനികാന്ത് പറഞ്ഞു. കാവേരി പ്രശ്‌നത്തില്‍ ചലച്ചിത്ര താരങ്ങളുടെ കൂട്ടായ്മ നടത്തുന്ന പ്രതിഷേധ വേദിയിലാണ് രജനികാന്ത് ഇക്കാര്യം പറഞ്ഞത്.
കാവേരി മാനേജ്‌മെന്റ് രൂപീകരിക്കണമെന്ന് ആവശ്യപ്പെട്ട് തമിഴ് ചലച്ചിത്ര താരങ്ങളുടെ കൂട്ടായ്മയായ 'നടികര്‍ സംഘ'മാണ് പ്രതിഷേധം സംഘടിപ്പിക്കുന്നത്. തമിഴ് ചലച്ചിത്ര താരങ്ങളായ കമല്‍ ഹാസന്‍, വിശാല്‍, വിജയ് തുടങ്ങിയവരും പ്രതിഷേധത്തില്‍ പങ്കെടുത്തു. നടികര്‍ക്ക് പുറമെ തമിഴ് ഫിലം പ്രൊഡ്യൂസേഴ്‌സ് കൗണ്‍സില്‍,സൗത്ത് ഇന്ത്യന്‍ ആര്‍ട്ടിസ്റ്റ് അസോസിയേഷന്‍, ഫിലിം എംപ്ലോയീസ് ഫെഡറേഷന്‍ ഓഫ് സൗത്ത് ഇന്ത്യ തുടങ്ങിയവയും പ്രതിഷേധത്തിന്റെ ഭാഗമാണ്.