തലശ്ശേരി: 1963ലെ തലശ്ശേരി ക്രിക്കറ്റ് സ്റ്റേഡിയം, രഞ്ജി ട്രോഫി ക്രിക്കറ്റ് ടൂര്‍ണമെന്റിന്റെ ഫൈനല്‍ മത്സരമാണ് ഗ്രൗണ്ടില്‍ പുരോഗമിക്കുന്നത്. കരുത്തരായ ആന്ധ്ര ടീമിനെതിരേ കളിക്കുന്നത് കേരള ടീം. ആകാംക്ഷ അടക്കാനാകാതെ ഗ്രൗണ്ടിലേക്ക് തന്നെ ഉറ്റുനോക്കി ആര്‍ത്തുവിളിക്കുന്ന കാണികളും കോച്ചും മറ്റു ടീമംഗങ്ങളും. വിജയ പരാജയങ്ങള്‍ പലതവണ മാറിമറിഞ്ഞ കളിക്കൊടുവില്‍ വിജയം കേരളത്തിനൊപ്പം നിന്നു. ആന്ധ്രപ്രദേശ് ടീമിന്റെ നിര്‍ണായകമായ നാല് വിക്കറ്റുകള്‍ വീഴ്ത്തുകയും 48 റണ്‍സെടുത്ത് ടീമിനെ വിജയിപ്പിക്കുകയും ചെയ്തത് ടീം ക്യാപ്റ്റന്‍ ബാബു അച്ചാരത്ത് ആയിരുന്നു. ക്രിക്കറ്റിന്റെ ഈറ്റില്ലമായ തലശ്ശേരിയില്‍ ജനിച്ചുവളര്‍ന്ന് ഒടുവില്‍ തലശ്ശേരിയില്‍ നടന്ന രഞ്ജി ട്രോഫി ക്രിക്കറ്റ് ഫൈനലില്‍ തന്നെ കേരളത്തെ വിജയിപ്പിച്ച വിജയ നായകനാണ് ഇന്നലെ കണ്ണൂരില്‍ അന്തരിച്ച ബാബു അച്ചാരത്ത്.
തലശ്ശേരിയിലെ പഴയ സിക്‌സര്‍ കുഞ്ഞിപ്പക്കിയുടെ മരുമകനായ ബാബു അച്ചാരത്ത് അമ്മാവന്റെ എല്ലാ ഗുണങ്ങളും തികഞ്ഞ മരുമകന്‍ തന്നെയായിരുന്നു. 1953ലാണ് തിരുകൊച്ചിക്ക് വേണ്ടി ബാബു അച്ചാരത്ത് ക്രിക്കറ്റ് കളിച്ചു തുടങ്ങിയത്. പിന്നീട് കേരള സംസ്ഥാനം രൂപീകരിച്ചതിന് ശേഷം കേരള ടീമില്‍ അംഗമായി. ഓള്‍റൗണ്ടറായിരുന്ന ബാബു അച്ചാരത്ത് 1963-65 കാലഘട്ടത്തിലാണ് കേരള ടീമിനെ നയിച്ചത്.
തലശ്ശേരി സ്റ്റേഡിയത്തില്‍ നടന്ന ആദ്യ കളിയും ബാബു അച്ചാരത്തിന്റെ നേതൃത്വത്തിലാണ് വിജയിച്ചത്. റൈറ്റ് ആം മീഡിയം പേസറായിരുന്ന അച്ചാരത്ത് പത്ത് സീസണുകളില്‍ കേരള ക്രിക്കറ്റിനെ പ്രതിനിധീകരിച്ചു. കളിയുടെ മൂന്ന് മേഖലകളിലും മികവ് തെളിയിച്ച അച്ചാരത്ത് 14 മത്സരങ്ങളില്‍ നിന്നായി 202 റണ്‍സും ആറ് വിക്കറ്റും നേടിയിട്ടുണ്ട്. 1956-57ല്‍ ആന്ധ്രയ്‌ക്കെതിരേ ആയിരുന്നു അരങ്ങേറ്റം. 1965-66ല്‍ ഹൈദരാബാദിനെതിരേയാണ് അവസാന സീസണ്‍ കളിച്ചത്. ആറ് തവണ കേരളത്തെ നയിച്ചു.
1972ല്‍ കാലിക്കറ്റ് സര്‍വലാശാലാ ക്രിക്കറ്റ് ടീം പരിശീലകനായി. 22 വര്‍ഷം ആ സ്ഥാനത്ത് പ്രവര്‍ത്തിച്ചു. 1957 മുതല്‍ 12 വര്‍ഷക്കാലം തലശ്ശേരി ബി.ഇ.എം.പി സ്‌കൂളില്‍ ഫിസിക്കല്‍ എജ്യുക്കേഷനില്‍ എന്‍.സി.സി അധ്യാപകനായി സേവനമനുഷ്ഠിച്ച ബാബു അച്ചാരത്ത് 1987-89 കാലഘട്ടത്തില്‍ ഇന്ത്യന്‍ യൂനിവേഴ്‌സിറ്റി ക്രിക്കറ്റ് കോച്ചായിരുന്നു. 1994ല്‍ സര്‍വിസില്‍ നിന്ന് വിരമിച്ചു. 1994 മുതല്‍ 1999 വരെ അഞ്ച് വര്‍ഷം കണ്ണൂര്‍ യൂനിവേഴ്‌സിറ്റി കോച്ചായി പ്രവര്‍ത്തിച്ച ബാബു 2006 വരെ കണ്ണൂര്‍ ജില്ലാ ക്രിക്കറ്റ് ടീം കോച്ചായിരുന്നു. 2007ല്‍ തലശ്ശേരി നഗരസഭ ഇദ്ദേഹത്തെ മികച്ച സ്‌പോര്‍ട്‌സ്മാന്‍ ബഹുമതി നല്‍കി ആദരിച്ചു. കുവൈറ്റിലായിരുന്ന സമയത്ത് കുവൈറ്റ് ഓയില്‍ കമ്പനിയുടെ ജൂനിയര്‍ ക്രിക്കറ്റ് ടീം കോച്ചായും സേവനമനുഷ്ഠിച്ചിരുന്നു.
കാലിക്കറ്റ് സര്‍വകലാശാല ടീം സെലക്ടര്‍, കേരള ജൂനിയര്‍ ടീമിന്റെയും സീനിയര്‍ ടീമിന്റെയും സെലക്ടര്‍, അഞ്ച് തവണ കേരള ടീം മാനേജര്‍, വി.സി ട്രോഫിക്കുള്ള ദക്ഷിണ മേഖലാ ടീം മാനേജര്‍ എന്നീ നിലകളിലും പ്രവര്‍ത്തിച്ചിട്ടുണ്ട്. കേരള ക്രിക്കറ്റ് അസോസിയേഷന്‍ നെറ്റ്‌സ് ആന്‍ഡ് കോച്ചിങ് സെന്റര്‍ ചെയര്‍മാനും ആയിരുന്നു. നല്ല ഫുട്‌ബോള്‍ കളിക്കാരന്‍ കൂടിയായ ബാബു ഓള്‍ ഇന്ത്യ ഫുട്‌ബോള്‍ ടൂര്‍ണമെന്റില്‍ പാകിസ്താന്‍ ടീമായ കറാച്ചി കിക്കേഴ്‌സിനെതിരേ കണ്ണൂര്‍ ജില്ലാ ടീമിന് വേണ്ടി കളിച്ചിട്ടുണ്ട്.