മലപ്പുറം: പെരിന്തല്‍മണ്ണ നഗരസഭ, സാംസ്‌കാരിക വകുപ്പ്, താലൂക്കിലെ തദ്ദേശ സ്ഥാപനങ്ങള്‍ എന്നിവയുടെ സഹകരണത്തോടെ വള്ളുവനാട് തനിമ സാംസ്‌കാരിക മഹോത്സവം നടത്തുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. ഇതോടനുബന്ധിച്ചുള്ള അന്താരാഷ്ട്ര ഫിലിം ഫെസ്റ്റിവലിന് ഇന്നലെ തുടക്കമായി. സവിതാ തിയേറ്ററില്‍ 14 വരെ 13 സിനിമകള്‍ പ്രദര്‍ശിപ്പിക്കും. 14ന് വൈകിട്ട് ആറിന് ബൈപ്പാസ് മൈതാനിയില്‍ നിയമസഭാ സ്പീക്കര്‍ പി ശ്രീരാമകൃഷ്ണന്‍ മഹോത്സവം ഉദ്ഘാടനം ചെയ്യും. അന്നേദിവസം വൈകിട്ട് 3.30ന് മുനിസിപ്പല്‍ ഷോപ്പിങ് കോംപ്ലക്‌സില്‍നിന്ന് സാംസ്‌കാരിക ഘോഷയാത്ര നടക്കും.
127 സ്റ്റാളുകള്‍, വാണിജ്യവ്യവസായ പ്രദര്‍ശനം, ഭക്ഷ്യമേള, ഓട്ടോ എക്‌സ്‌പോ, അമ്യൂസ്‌മെന്റ് വിനോദ പാര്‍ക്ക് എന്നിവയുമുണ്ടാവും. 23 വരെ വൈകിട്ട് മൂന്നുമുതല്‍ രാത്രി 10.30 വരെയാണ് എക്‌സ്‌പോ നടക്കുക. എല്ലാ ദിവസവും നാലുമുതല്‍ ആറു വരെ സാംസ്‌കാരിക സദസും ആറുമുതല്‍ 6.30 വരെ പ്രതിഭകളെ ആദരിക്കല്‍, തുടര്‍ന്ന് കലാപരിപാടികളുമുണ്ടാവും. 23ന് മന്ത്രി എ.കെ ബാലന്‍ സമാപന സമ്മേളനം ഉദ്ഘാടനം ചെയ്യും.
വാര്‍ത്താ സമ്മേളനത്തില്‍ നഗരസഭ ചെയര്‍മാന്‍ എം. മുഹമ്മദ് സലീം, സെക്രട്ടറി കെ. പ്രമോദ്, കിഴിശ്ശേരി മുസ്തഫ, വിന്നര്‍ സലീം എന്നിവര്‍ പങ്കെടുത്തു.