കൊണ്ടോട്ടി: നഗരസഭ കൗണ്‍സില്‍ യോഗത്തില്‍ ലൈഫ് മിഷന്‍ പദ്ധതിയെ ചൊല്ലി ഭരണ-പ്രതിപക്ഷ ബഹളം. ലൈഫ് മിഷന്‍ പദ്ധതിക്ക് 50 ശതമാനം ഫണ്ട് സര്‍ക്കാര്‍ വഹിക്കണമെന്നാവശ്യപ്പെട്ട് യു.കെ മമ്മദിശ അടിയന്തര പ്രമേയം അവതരിപ്പിച്ചിരുന്നു. സര്‍ക്കാര്‍ പ്രചാരണം നടത്തി നടപ്പാക്കുന്ന പദ്ധതിക്ക് സര്‍ക്കാര്‍ ഒരു രൂപ പോലും ചെലവാക്കുന്നില്ലെന്നും നഗരസഭ 2.48 കോടി രൂപ വകയിരുത്തേണ്ട ഗതികേടാണെന്നും ചൂണ്ടിക്കാട്ടിയായിരുന്നു പ്രമേയം.
നാലു ലക്ഷം രൂപയാണ് ലൈഫ്മിഷന്‍ വഴിയുള്ള ഓരോ വീടുകള്‍ക്കും നല്‍കേണ്ടത്. ഇത് നഗരസഭക്ക് കടുത്ത ബാധ്യത വരുത്തും. നഗരസഭയില്‍ 62 പേര്‍ക്കാണ് ലൈഫ് മിഷന്‍ വഴി വീടിന് പണം നല്‍കേണ്ടത്. ഇതിനുള്ള തുക ഓണ്‍ഫണ്ടായി നല്‍കണമെന്നാണ് നിര്‍ദേശം. പദ്ധതികള്‍ തയാറാക്കിയതിന് ശേഷമുള്ള സര്‍ക്കാര്‍ ഉത്തരവ് തദ്ദേശ സ്ഥാപനങ്ങള്‍ക്ക് കടുത്ത ബാധ്യതവരുത്തും. പി.എം.എ.വൈ പദ്ധതിക്കും ഫണ്ട് നല്‍കുമ്പോഴാണ് നിലവില്‍ ലൈഫ് മിഷനെത്തുന്നത്. ലൈഫ് മിഷന്റെ 50 ശതമാനം തുക സര്‍ക്കാര്‍ നല്‍കണമെന്ന് പ്രമേയം ആവശ്യപ്പെട്ടു.
കഴിഞ്ഞ തവണ തങ്ങള്‍ ലൈഫ് പദ്ധതിക്ക് വേണ്ടി തുക വകയിരുത്തിയിട്ടുണ്ടെന്ന് ചൂണ്ടിക്കാട്ടി പ്രതിപക്ഷം രംഗത്തെത്തിയതോടെ ബഹളമായി. റോഡിനും മറ്റാവശ്യങ്ങള്‍ക്കും നഗരസഭ ഫണ്ട് ചെലവഴിക്കുന്നുണ്ടെന്നും നഗരസഭയാണ് ലൈഫ് പദ്ധതിക്ക് വേണ്ടി തുക കണ്ടെത്തേണ്ടതെന്നും പ്രതിപക്ഷവും വാദിച്ചു.
പ്രതിപക്ഷം യോഗം ബഹിഷ്‌കരിച്ച് ഇറങ്ങിപ്പോയി. കക്ഷി നേതാക്കള്‍ക്ക് പ്രാധാന്യം നല്‍കുന്നില്ലെന്ന് ആരോപിച്ച് നേരത്തെ എസ്.ഡി.പി.ഐ കൗണ്‍സിലര്‍ വി. അബ്ദുല്‍ ഹക്കീമും യോഗം ബഹിഷ്‌കരിച്ചിരുന്നു.
വിവിധ പദ്ധതികള്‍ക്ക് ചെയര്‍മാന്‍ സി.കെ നാടിക്കുട്ടിയുടെ അധ്യക്ഷതയില്‍ ചേര്‍ന്ന യോഗം അംഗീകാരം നല്‍കി.
തെരുവ് വിളക്കുകളുടെ നവീകരണം പൂര്‍ത്തിയാക്കാന്‍ പുതുതായി ഒരാളെക്കൂടി നിയമിക്കാന്‍ തീരുമാനിച്ചു.
നെടിയിരുപ്പില്‍ സിനിമ തിയേറ്റര്‍ നിര്‍മാണത്തിനായി നല്‍കിയ അപേക്ഷ മാറ്റിവച്ചു.