തിരുവനന്തപുരം: ഓഗസ്റ്റ് 15 മുതല്‍ നടത്തുന്ന പരീക്ഷകള്‍ എഴുതുന്നതിന് മുന്‍കൂട്ടി അറിയിക്കണമെന്ന് പി.എസ്.സി. ഇതിനുള്ള സംവിധാനം ഏര്‍പ്പെടുത്താനും പി.എസ്.സി യോഗത്തില്‍ തീരുമാനമായി. നിരവധിപേര്‍ അപേക്ഷിക്കുകയും കുറച്ചുപേര്‍ മാത്രം പരീക്ഷ എഴുതുന്നതിലൂടെയുമുണ്ടാകുന്ന പ്രശ്‌നങ്ങള്‍ പരിഹരിക്കുന്നതിനു വേണ്ടിയാണ് അപേക്ഷകള്‍ക്ക് പി.എസ്.സി കണ്‍ഫര്‍മേഷന്‍ സംവിധാനം ഏര്‍പ്പെടുത്തുന്നത്.
പരീക്ഷാ തിയതിക്ക് 70 ദിവസം മുന്‍പ് പരീക്ഷാ കലണ്ടര്‍ പി.എസ്.സി പ്രസിദ്ധീകരിക്കും. ഈ കലണ്ടറില്‍ ഓരോ പരീക്ഷയുടേയും തിയതിക്കൊപ്പം പരീക്ഷാ തിയതിക്ക് മുന്‍പുള്ള 60 മുതല്‍ 40 ദിവസങ്ങള്‍ കണ്‍ഫര്‍മേഷന്‍ നല്‍കുന്നതിനുള്ള സമയമായും നല്‍കും.
അതിനുശേഷം പരീക്ഷാ തിയതിക്ക് 15 ദിവസം മുമ്പുവരെ ഹാള്‍ടിക്കറ്റ് ഡൗണ്‍ലോഡ് ചെയ്യുന്നതിന് അവസരം ലഭിക്കും. ഇതിനെല്ലാമുള്ള തിയതികള്‍ പി.എസ്.സി പ്രസിദ്ധീകരിക്കും.
പരീക്ഷാ കലണ്ടര്‍ പ്രസിദ്ധീകരിച്ചാല്‍ അതില്‍ ഉള്‍പ്പെട്ട ഓരോ തിരഞ്ഞെടുപ്പിലെയും അപേക്ഷകരായ ഉദ്യോഗാര്‍ഥികള്‍ക്ക് കണ്‍ഫര്‍മേഷന്‍, ഹാള്‍ടിക്കറ്റ് ഡൗണ്‍ലോഡിങ് എന്നിവക്കുള്ള തിയതികളെപ്പറ്റി പ്രൊഫൈലിലും എസ്.എം.എസ് മുഖേനയും അറിയിപ്പ് നല്‍കും.
പ്രൊഫൈല്‍ സന്ദേശം ഉദ്യോഗാര്‍ഥി കണ്ടുവെന്നു മനസിലാക്കുന്നതിനുള്ള സംവിധാനവും ഏര്‍പ്പെടുത്തും. തുടര്‍ന്ന് കണ്‍ഫര്‍മേഷന്‍ ആയ അപേക്ഷകര്‍ക്ക് മാത്രം പരീക്ഷാ കേന്ദ്രങ്ങള്‍ അനുവദിച്ച് നല്‍കുന്നതാണ് പുതിയ സംവിധാനം.