നീലേശ്വരം: സി.പി.ഐ 23-ാം പാര്‍ട്ടി കോണ്‍ഗ്രസ് നഗരിയില്‍ ഉയര്‍ത്താനുള്ള പതാക വഹിച്ചുകൊണ്ടുള്ള ജാഥ പ്രയാണമാരംഭിച്ചു. 25 മുതല്‍ 29 വരെ കൊല്ലത്താണ് പാര്‍ട്ടി കോണ്‍ഗ്രസ് നടക്കുന്നത്.
കയ്യൂര്‍ ചൂരിക്കാടന്‍ കൃഷ്ണന്‍ നായര്‍ സ്മൃതിമണ്ഡപത്തില്‍ നിന്നാണ് ജാഥ ആരംഭിച്ചത്. പതാക സി.പി.ഐ കേന്ദ്ര സെക്രട്ടേറിയറ്റ് അംഗം പന്ന്യന്‍ രവീന്ദ്രന്‍ ജാഥാ ലീഡര്‍ ബിനോയ് വിശ്വത്തിന് കൈമാറി. മോദി നയിക്കുന്ന ബി.ജെ.പി സര്‍ക്കാരിനെ അധികാരത്തില്‍നിന്ന് പുറത്താക്കാന്‍ ബദലിനുവേണ്ടി ഇരുട്ടില്‍ത്തപ്പേണ്ടതില്ലെന്ന് പന്ന്യന്‍ രവീന്ദ്രന്‍ പറഞ്ഞു.
കെ.പി രാജേന്ദ്രന്‍, വി. ചാമുണ്ണി, അഡ്വ.പി. വസന്തം, മഹേഷ് കക്കത്ത്, അഡ്വ.ഗോവിന്ദന്‍ പള്ളിക്കാപ്പില്‍ എന്നിവര്‍ പങ്കെടുത്തു. ജാഥ 25ന് വൈകിട്ട് കൊല്ലത്തെ സമ്മേളന നഗരിയില്‍ എത്തിച്ചേരും.