തിരുവനന്തപുരം: പാലോട് ഇന്‍സ്റ്റിറ്റ്യൂട്ട് ഓഫ് അനിമല്‍ ഹെല്‍ത്ത് ആന്‍ഡ് വെറ്ററിനറി ബയോളജിക്കല്‍സ് വികസിപ്പിച്ചെടുത്ത എന്ററോടോക്‌സീമിയ വാക്‌സിന്റെ വിതരണോദ്ഘാടനം മൃഗസംരക്ഷണ വകുപ്പ് മന്ത്രി അഡ്വ. കെ. രാജു നിര്‍വഹിച്ചു.
കോലാടുകളേയും ചെമ്മരിയാടുകളേയും എന്ററോടോക്‌സീമിയ എന്ന രോഗത്തില്‍ നിന്ന് സംരക്ഷിക്കുന്നതിനുള്ള വാക്‌സിനാണ്. കേന്ദ്ര ഗവണ്‍മെന്റ് സ്ഥാപനമായ ഉത്തര്‍പ്രദേശിലെ ഇസത്ത് നഗറിലുളള ഇന്ത്യന്‍ വെറ്ററിനറി റിസര്‍ച്ച് ഇന്‍സ്റ്റിറ്റ്യൂട്ടിന്റെ സാങ്കേതിക സഹകരണത്തോടെയാണ് ഇത് സാക്ഷാല്‍ക്കരിച്ചത്.
പേരൂര്‍ക്കട സ്റ്റേറ്റ് വെറ്ററിനറി കൗണ്‍സില്‍ ഹാളില്‍ നടന്ന ചടങ്ങില്‍ കെ. മുരളീധരന്‍ എം.എല്‍.എ അധ്യക്ഷനായി.
വാക്‌സിന്‍ നിര്‍മാണത്തില്‍ പങ്കാളികളായ ശാസ്ത്രജ്ഞരേയും മറ്റ് ഉദ്യോഗസ്ഥരേയും പാലോട് ഇന്‍സ്റ്റിറ്റ്യൂട്ട് കാംപസില്‍ മുയല്‍ ശില്‍പം തീര്‍ത്തആര്യനാട് രാജേന്ദ്രനെയും ആദരിച്ചു. ഇന്‍സ്റ്റിറ്റ്യൂട്ടിന്റെ ലോഗോ പ്രകാശനം ഡെപ്യൂട്ടി മേയര്‍ അഡ്വ. രാഖി രവികുമാര്‍ നിര്‍വഹിച്ചു.
വാക്‌സിന്റെ ലഘുലേഖ ഫാം ഇന്‍ഫര്‍മേഷന്‍ ബ്യൂറോ പ്രിന്‍സിപ്പല്‍ ഇന്‍ഫര്‍മേഷന്‍ ഓഫിസര്‍ കെ.എസ് ലാലിക്ക് കൈമാറി. ഇന്‍സ്റ്റിറ്റ്യൂട്ട് ഡയരക്ടര്‍ ഡോ. ബാബു. എസ്. വാക്‌സിനെക്കുറിച്ച് ആമുഖ പ്രഭാഷണം നടത്തി.
മൃഗസംരക്ഷണവകുപ്പ് ഡയരക്ടര്‍ ഡോ. എന്‍.എന്‍ ശശി ചടങ്ങില്‍ സ്വാഗതവും ഡോ. ജയചന്ദ്രകമ്മത്ത് നന്ദിയും പറഞ്ഞു.