തിരുവനന്തപുരം: കോവളം കണ്ടല്‍ കാടിനുള്ളില്‍ കണ്ടെത്തിയ വിദേശവനിതയുടെ ജീര്‍ണിച്ച മൃതദേഹം കാണാതായ ലാത്വിയ സ്വദേശി ലിഗയുടേതാണെന്നു ബന്ധുക്കള്‍ തിരിച്ചറിഞ്ഞെങ്കിലും ശരീരത്തിലുള്ള ജാക്കറ്റ് ആരുടേതെന്ന ദുരൂഹത തുടരുന്നു. തലമുടിയുടെ ഹെയര്‍ ക്ലിപ്പ്, ടി-ഷര്‍ട്ട്, ഹാഫ് പാന്റ്, പല്ലിന്റെ പ്രത്യേകത എന്നിവ കണ്ടാണു സഹോദരി ഇലീസ് മൃതദേഹം തിരിച്ചറിഞ്ഞത്. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണം ഉണ്ടായിട്ടില്ല. മാത്രമല്ല മൃതദേഹത്തിലുള്ള ജാക്കറ്റും സമീപത്തു കിടന്ന ചെരിപ്പും ലിഗയുടേതല്ല. അന്വേഷണത്തില്‍ തൃപ്തയല്ലെന്ന് ഇലിസ് ചൂണ്ടിക്കാട്ടിയതോടെ പൊലിസിന് ഇനി തലവേദനയുടെ നാളുകളായിരിക്കും.