കോഴിക്കോട്: നിയമസഭയുടെ വജ്രജൂബിലി ആഘോഷങ്ങള്‍ക്ക് ഇന്ന് കോഴിക്കോട്ട് തുടക്കമാകും. ഈ മാസം 27 വരെ നീണ്ടുനില്‍ക്കുന്ന പരിപാടിയുടെ ഉദ്ഘാടനവും സി.എച്ച് മുഹമ്മദ്‌കോയ അനുസ്മരണവും ഇന്ന് വൈകിട്ട് നാലിന് ടാഗോര്‍ സെന്റിനറി ഹാളില്‍ സ്പീക്കര്‍ പി. ശ്രീരാമകൃഷ്ണന്‍ നിര്‍വഹിക്കുമെന്ന് ജില്ലാ കലക്ടര്‍ യു.വി ജോസ് അറിയിച്ചു.
ചടങ്ങില്‍ മുന്‍ നിയമസഭാ സാമാജികരെയും സ്വാതന്ത്ര്യസമര സേനാനികളെയും ആദരിക്കും. മന്ത്രി എ.കെ ശശീന്ദ്രന്‍ അധ്യക്ഷനാകും. മുന്‍ അഡിഷനല്‍ ചീഫ് സെക്രട്ടറി ഡി. ബാബുപോള്‍, എം.പിമാരായ എം.കെ രാഘവന്‍, മുല്ലപ്പള്ളി രാമചന്ദ്രന്‍, വി. മുരളീധരന്‍ തുടങ്ങിയവര്‍ സംബന്ധിക്കും. ടൗണ്‍ഹാളില്‍ നിയമസഭാ മ്യൂസിയം വിഭാഗം സംഘടിപ്പിക്കുന്ന ചരിത്രപ്രദര്‍ശനം നാളെ രാവിലെ 10ന് സി.കെ നാണു ഉദ്ഘാടനം ചെയ്യും. 27 ന് വൈകിട്ട് അഞ്ചിന് നടക്കുന്ന സമാപനസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഡോ. എം.കെ മുനീര്‍ അധ്യക്ഷനാകുന്ന ചടങ്ങില്‍ ജില്ലയിലെ മുഴുവന്‍ എം.എല്‍.എമാരും പങ്കെടുക്കും.