കോഴിക്കോട്: വിദ്യാര്‍ഥികളെയും യുവാക്കളെയും ലക്ഷ്യമിട്ട് മൈസുരുവില്‍ നിന്നുമെത്തിച്ച 250 ഓളം ലഹരി ഗുളികകളുമായി യുവാവ് പിടിയിലായി.
ചെറുവണ്ണൂര്‍ സ്വദേശി രജിത്ത് (32) ആണ് എക്‌സൈസ് സംഘത്തിന്റെ പിടിയിലായത്.
മനോരോഗികള്‍ക്ക് നല്‍കാനുള്ളതും വേദന സംഹാരിയുമായ നൈട്രാസ്പാം, സ്പാസ്‌മോ പ്രോക്‌സിവോണ്‍ എന്നീ ഇനത്തില്‍പ്പെട്ട ഗുളികകളാണ് പിടിച്ചെടുത്തത്.
മൈസുരുവില്‍നിന്ന് കുറഞ്ഞ വിലക്ക് വാങ്ങുന്ന ഗുളികകള്‍ ചില്ലറ വില്‍പന നടത്തുകയാണ് പതിവ്.
കോഴിക്കോട് എക്‌സൈസ് സര്‍ക്കിള്‍ ഓഫിസിലെ എക്‌സൈസ് ഇന്‍സ്‌പെക്ടര്‍ പി. മുരളീധരനും സംഘവുമാണ് ഇയാളെ അറസ്റ്റ് ചെയ്തത്. സര്‍ക്കിള്‍ ഇന്‍സ്‌പെക്ടര്‍ പ്രേംകൃഷ്ണയുടെ നിര്‍ദേശ പ്രകാരം ഷാഡോ എക്‌സൈസിന്റെ നിരീക്ഷണത്തിലായിരുന്നു പ്രതി. ഇവയുടെ ദുരുപയോഗം യുവാക്കള്‍ക്കിടയില്‍ കൂടിവരുന്നതായി എക്‌സൈസിന്റെ ശ്രദ്ധയില്‍പ്പെട്ടിട്ടുണ്ട്. റെയ്ഡില്‍ അസിസ്റ്റന്റ് ഇന്‍സ്‌പെക്ടര്‍ പി. സതീശന്‍, സിവില്‍ എക്‌സൈസ് ഓഫിസര്‍മാരായ പ്രവീണ്‍, ജുബീഷ് എന്നിവര്‍ പങ്കെടുത്തു. പ്രതിയെ കോടതിയില്‍ ഹാജരാക്കി.