പെരുവ: മുളക്കുളം അച്ചന്‍ പടിയില്‍ മോര്‍ ഇഗ്‌നാത്തിയോസ് ഏലിയാസ് തൃതീയന്‍ ചാപ്പല്‍ പള്ളിമുറ്റത്ത് നിര്‍ത്തിയിട്ടിരുന്ന ജീപ്പ് കത്തി നശിച്ചു. പള്ളിയില്‍ നടന്ന വിവാഹാവശ്വത്തിന് ജനറേറ്റര്‍ കൊണ്ടുവന്ന ജീപ്പാണ് പള്ളിക്കകത്ത് വിവാഹ ചടങ്ങുകള്‍ നടന്നുകൊണ്ടിരുന്നപ്പോള്‍ പള്ളിയുടെ മുന്‍വശത്തെ മുറ്റത്ത് കത്തിയത്. ജനറേറ്റര്‍ ജീപ്പിന്റെ
അകത്ത് പുറക് വശത്ത് വച്ച്സ്റ്റാര്‍ട്ട് ചെയ്തിട്ട് പുറകിലെ ഡോറും തുറന്നിട്ടാണ് ഓപ്പറേറ്റര്‍ പോയത്. ജീപ്പിന്റെ ഡോര്‍ തുറന്ന് കിടക്കുന്ന കണ്ട ആരോ ഡോര്‍ അടച്ചട്ട് പോയി. ഇതിന് ശേഷമാണ് ജീപ്പ് കത്തിയത്. ജനറേറ്റര്‍ തകരാറാണോ ഡോര്‍ അടഞ്ഞ് കിടന്ന് പുക പുറത്ത് പോകാത്തതാണോ തീപിടിക്കാന്‍ കാരണമെന്ന് അറിവായിട്ടില്ല. ജീപ്പ് പൂര്‍ണ്ണമായും കത്തിനശിച്ചു.
മുളക്കുളം മാളിയേക്കല്‍ ദീപുവിന്റെ മഹീന്ദ്ര അര്‍മദ ജീപ്പും ജനറേറ്ററുമാണ് കത്തിയത്. വിവാഹ ചടങ്ങുകള്‍ പള്ളിക്കകത്ത് നടക്കുന്നതിനാല്‍ മുറ്റത്ത് ആരുമില്ലായിരുന്നു. അതിനാല്‍ വന്‍ ദുരന്തം ഒഴിവായി. പിറവം, കടുത്തുരുത്തി എന്നിവടങ്ങളില്‍ നിന്ന് അഗ്‌നിശമനസേന എത്തി തീ അണച്ചു