തൃശൂര്‍: മണ്ണിലും വിണ്ണിലും ആരവത്തിന്റെയും ആഹ്ലാദത്തിന്റെയും ആയിരം ഭാവങ്ങള്‍ വിരിയിച്ച മഹാപൂരത്തിന് കൊടിയിറക്കം. തൃശൂര്‍ ദേശവാസികളുടെ പൂരമെന്ന വിശേഷണമുള്ള പകല്‍പ്പൂരം രാവിലെ എട്ടോടെയാണ് തുടങ്ങിയത്. പാറമേക്കാവ് ഭഗവതി മണികണ്ഠനാലില്‍ നിന്നും തിരുവമ്പാടി ഭഗവതി നായ്ക്കനാലില്‍ നിന്നും എഴുന്നള്ളി.
ഇരുവിഭാഗത്തിന്റെയും പാണ്ടിമേളത്തിനൊപ്പം കുടമാറ്റവും നടന്നു. മുഖാമുഖം അണിനിരന്ന ദേവിമാര്‍ ഒടുവില്‍ ഉപചാരം ചൊല്ലി പിരിഞ്ഞതോടെ തൃശൂര്‍ പൂരത്തിന് വിരാമമായി.
സുരക്ഷാക്രമീകരണങ്ങള്‍ കാരണം പതിവിലും വൈകിയാണ് ഇക്കുറി പകല്‍ വെടിക്കെട്ട് നടന്നത്. കാഴ്ചഭംഗിയേക്കാള്‍ കൂടുതല്‍ ശബ്ദത്തിന് പ്രാമുഖ്യം നല്‍കുന്ന പകല്‍ വെടിക്കെട്ട് കാണാന്‍ ആയിരങ്ങളാണ് എത്തിയത്. മേടമാസത്തിലെ പൂരം നക്ഷത്ര ദിവസമായ 2019 മെയ് 15നാണ് അടുത്ത പൂരം.