ബീജിങ്: വടക്കന്‍ ചൈനയില്‍ കത്തി ആക്രമണത്തില്‍ ഏഴ് കുട്ടികള്‍ കൊല്ലപ്പെട്ടു. 19 പേര്‍ക്ക് പരുക്കേല്‍ക്കുകയും ചെയ്തു.

ഷാന്‍ക്‌സി പ്രവിശ്യയിലാണ് സംഭവം. അക്രമിയെ പൊലിസ് പിടികൂടിയിട്ടുണ്ട്.

സ്‌കൂള്‍ വിട്ട് വീട്ടിലേക്കു മടങ്ങുകയായിരുന്നു കുട്ടികള്‍ക്കു നേരെയാണ് ആക്രമണമുണ്ടായത്. സംഭവത്തേക്കുറിച്ച് കൂടുതല്‍ വിവരങ്ങള്‍ പുറത്തുവന്നിട്ടില്ല.

കഴിഞ്ഞവര്‍ഷം തെക്കന്‍ നഗരമായ ഷെന്‍ഴാനിലുണ്ടായ കത്തി ആക്രമണത്തില്‍ രണ്ടു പേര്‍ കൊല്ലപ്പെടുകയും ഒന്‍പതു പേര്‍ക്ക് പരുക്കേല്‍ക്കുകയും ചെയ്തിരുന്നു.