കൊച്ചി: സി.ബി.എസ്.ഇയുടെ പത്താംക്ലാസ് കണക്ക് പരീക്ഷയുടെ ചോദ്യപേപ്പര്‍ മാറിനല്‍കിയെന്ന പരാതി ശരിയല്ലെന്ന് അധികൃതര്‍ ഹൈക്കോടതിയില്‍ അറിയിച്ചു. കോട്ടയം മൗണ്ട് കാര്‍മല്‍ വിദ്യാനികേതന്‍ സ്‌കൂളിലെ വിദ്യാര്‍ഥിനിയായ അമീയ സലിം നല്‍കിയ ഹരജിയിലാണ് സി.ബി.എസ്.ഇ വിശദീകരണം നല്‍കിയത്.
മാര്‍ച്ച് 28ന് നടത്തിയ കണക്ക് പരീക്ഷയില്‍ തനിക്ക് പഴയ ചോദ്യപേപ്പറാണ് ലഭിച്ചതെന്നും ഇതറിയാതെ താന്‍ പരീക്ഷയെഴുതി എന്നുമാണ് ഹരജിക്കാരിയുടെ പരാതി. എന്നാല്‍ ചോദ്യപേപ്പര്‍ മാറിയ വിവരം വിദ്യാര്‍ഥിനി ഇന്‍വിജിലേറ്ററെ അറിയിച്ചില്ലെന്നും 2016ല്‍ തന്റെ സഹോദരന്‍ എഴുതിയ പരീക്ഷയുടെ ചോദ്യപേപ്പറുമായെത്തി പരീക്ഷ എഴുതിയതാകാമെന്നും സി.ബി.എസ്.ഇ അധികൃതര്‍ ആരോപിക്കുന്നു. വിദ്യാര്‍ഥിനിയുടെ ആരോപണം ശരിയല്ലാത്തതിനാല്‍ ഹരജി തള്ളണമെന്നും വിശദീകരണത്തില്‍ പറയുന്നു.പരീക്ഷയുടെ വിവരങ്ങള്‍ പിന്നീട് കൂട്ടുകാരുമായി പങ്കുവയ്ക്കുമ്പോഴാണ് ചോദ്യപേപ്പര്‍ മാറിയ വിവരം അറിഞ്ഞതെന്നും പ്രിന്‍സിപ്പലിന് പരാതി നല്‍കിയെന്നും ഹരജിയില്‍ പറയുന്നുണ്ട്. ഹരജി വെള്ളിയാഴ്ച ഹൈക്കോടതി വീണ്ടും പരിഗണിക്കും.