പാരിസ്: സീസണ്‍ അവസാനിക്കുന്നതോടെ ക്ലബ് വിടുമെന്ന് പാരിസ് സെന്റ് ജെര്‍മെയ്ന്‍ പരിശീലകന്‍ ഉനയ് എംറെ. സീസണ്‍ അവസാനത്തോടെ ക്ലബുമായുള്ള എംറെയുടെ കരാര്‍ അവസാനിക്കും. പുതിയ കരാര്‍ നല്‍കാന്‍ പി.എസ്.ജി തയ്യാറാകാത്തതിനെ തുടര്‍ന്നാണ് കോച്ച് നിലപാട് വ്യക്തമാക്കിയത്. 2016ലാണ് ലോറന്റ് ബ്ലാങ്കിന് പകരം എംറെ പി.എസ്.ജിയുടെ പരിശീലക സ്ഥാനത്തെത്തിയത്. ഈ സീസണില്‍ ഫ്രഞ്ച് ലീഗ് വണ്‍ കിരീടം ഏതാണ്ടുറപ്പിച്ചാണ് പി.എസ്.ജി നില്‍ക്കുന്നത്. അതേസമയം വന്‍ തുകയ്ക്ക് സൂപ്പര്‍ താരം നെയ്മറെയടക്കമുള്ളവരെ ടീമിലെത്തിക്കാന്‍ സാധിച്ചെങ്കിലും ചാംപ്യന്‍സ് ലീഗിന്റെ പ്രീ ക്വാര്‍ട്ടറില്‍ നിലവിലെ ചാംപ്യന്‍മാരായ റയല്‍ മാഡ്രിഡിനോട് പരാജയപ്പെട്ട് ടീം പുറത്തായിരുന്നു. സ്പാനിഷ് ക്ലബ് സെവിയ്യയെ തുടര്‍ച്ചയായി മൂന്ന് തവണ യൂറോപ്പ ലീഗ് കിരീടത്തിലേക്ക് നയിച്ചാണ് എംറെ ശ്രദ്ധേയനായത്. ആഴ്‌സണല്‍ വിടുന്ന ആഴ്‌സന്‍ വെങറോ, ചെല്‍സി പരിശീലക സ്ഥാനമൊഴിയുന്ന അന്റോണിയോ കോണ്ടെയോ പി.എസ്.ജിയുടെ അടുത്ത പരിശീലകനായേക്കുമെന്ന് റിപ്പോര്‍ട്ടുകളുണ്ട്.