സമോറിന്‍: സ്ലോവാക്യയില്‍ നടക്കുന്ന അത്‌ലറ്റിക്‌സ് ഗ്രാന്‍ഡ് പ്രിക്‌സില്‍ ഇന്ത്യന്‍ റിലേ ടീമിന് സ്വര്‍ണം. 4-400 മീറ്റര്‍ റിലേയില്‍ ജോന മുര്‍മു, അശ്വിനി അക്കുഞ്ജി, അനില്‍ഡ തോമസ്, എം.ആര്‍ പൂവമ്മ എന്നിവരടങ്ങുന്ന ടീമാണ് നേട്ടം സ്വന്തമാക്കിയത്. 3.31.39 സെക്കന്‍ഡിലാണ് ഫിനിഷ് ചെയ്തത്. ജയത്തോടെ ഒളിംപിക്‌സ് പ്രതീക്ഷ സജീവമാക്കാനും ടീമിന് സാധിച്ചു.
റാങ്കിങ് പ്രകാരമാണ് ടീമിന് യോഗ്യത ലഭിക്കുക. നിലവില്‍ 16ാം സ്ഥാനത്താണ് ഇന്ത്യന്‍ റിലേ ടീം. ഈ സ്ഥാനം നിലനിര്‍ത്തിയാല്‍ ഇന്ത്യക്ക് ഒളിംപിക് യോഗ്യത ഉറപ്പിക്കാം. എന്നാല്‍ ജര്‍മനി ഇന്ത്യക്ക് ഭീഷണിയുയര്‍ത്തി തൊട്ടുപിന്നിലുണ്ട്. 16 ടീമുകള്‍ക്ക് മാത്രം യോഗ്യത ലഭിക്കുന്നതിനാല്‍ യൂറോപ്പില്‍ നടക്കുന്ന ടൂര്‍ണമെന്റുകളില്‍ ടീമിന് മികച്ച പ്രകടനം കാഴ്ച്ച വയ്‌ക്കേണ്ടി വരും.