ചങ്ങരംകുളം: പ്രഭാത സവാരിക്കിറങ്ങിയ വ്യാപാരി അജ്ഞാതവാഹനമിടിച്ച് മരിച്ചസംഭവത്തില്‍ വാഹനം പോലീസ് പിടികൂടി.
കോഴിക്കോട്ടുനിന്നാണ് കാര്‍ കസ്റ്റഡിയിലെടുത്തത്. കഴിഞ്ഞ ഞായറാഴ്ചയാണ് ചങ്ങരംകുളത്തെ പലചരക്ക് വ്യാപാരിയും കാരുണ്യം പാലിയേറ്റീവ് സൊസൈറ്റി വൈസ് പ്രസിഡന്റുമായ മേലേ മാന്തടം ഊരത്ത് വാസുവി(69)നെ പ്രഭാത സവാരിക്കിടെ മേലേ മാന്തടത്തുവെച്ച് അജ്ഞാതവാഹനം ഇടിച്ചുതെറിപ്പിച്ച് നിര്‍ത്താതെ പോയത്. സംഭവസ്ഥലത്തുനിന്ന് വാഹനത്തിന്റെ കണ്ണാടിയും ചില ഭാഗങ്ങളും പോലീസിന് ലഭിച്ചിരുന്നു. ഇവയും വിവിധ സ്ഥലങ്ങളിലെ നാല്‍പ്പതിലധികം ക്യാമറകളും പരിശോധിച്ചതിനുശേഷമാണ് വാഹനം കാറാണെന്ന് തിരിച്ചറിഞ്ഞത്. വാഹനം ഓടിച്ചിരുന്ന ആളെ പിടികൂടാന്‍ കഴിഞ്ഞിട്ടില്ല. ഇയാള്‍ ഒളിവിലാണ്.