കാസര്‍കോട്: ഡോക്ടര്‍മാര്‍ക്ക് പിന്നാലെ കര്‍ഷക തൊഴിലാളി ക്ഷേമനിധി ബോര്‍ഡിലെ ഒരു വിഭാഗം ജീവനക്കാരുടെ കൂടി പെന്‍ഷന്‍ പ്രായവും 60 ആക്കി വര്‍ധിപ്പിച്ചുകൊണ്ട് സര്‍ക്കാര്‍ ഉത്തരവ്.
എംപ്ലോയീസ് പ്രൊഫിഡന്റ് ഫണ്ടിന്റെ പെന്‍ഷന്‍ ഉള്‍പ്പെടെയുള്ള ആനുകൂല്യങ്ങള്‍ ലഭിക്കാന്‍ വേണ്ടിയാണ് പുതുവത്സര ദിനത്തില്‍ അഡീഷണല്‍ ചീഫ് സെക്രട്ടറി സത്യജിത്ത് രാജന്‍ ഒരു വിഭാഗം ജീവനക്കാരുടെ പെന്‍ഷന്‍ പ്രായം 56 ല്‍ നിന്നും 60 ആക്കി ഉയര്‍ത്തി ഉത്തരവ് പുറപ്പെടുവിച്ചിരിക്കുന്നത്. നേരത്തെയും ഇ.പി.എഫ് പെന്‍ഷന്‍ പദ്ധതിയില്‍ ഉള്‍പ്പെടാന്‍ ബോര്‍ഡിലെ കുറച്ചു ജീവനക്കാരുടെ വിരമിക്കല്‍ പ്രായം 60 ആക്കിയിരുന്നു. പെന്‍ഷന്‍ പ്രായം വര്‍ധിപ്പിച്ചുകൊണ്ടുള്ള അടിക്കടിയുള്ള തീരുമാനം ദൂരവ്യാപകമായ പ്രത്യാഘാതങ്ങള്‍ക്ക് ഇടയാക്കിയേക്കും. മാനുഷിക പരിഗണനയുടെ പേരില്‍ ഈ തീരുമാനത്തോട് കാര്യമായ പ്രതിഷേധം ഉയരാന്‍ ഇടയില്ലെങ്കിലും സമാനമായ മറ്റ് ജീവനക്കാരും ഇക്കാര്യം ചൂണ്ടിക്കാട്ടി പെന്‍ഷന്‍ പ്രായം വര്‍ധിപ്പിക്കണമെന്നാവശ്യപ്പെട്ട് കോടതിയെ സമീപിച്ചാല്‍ അത് സര്‍ക്കാരിന് പ്രതിസന്ധിയാകാനിടയുണ്ട്. മാത്രമല്ല, പെന്‍ഷന്‍ പ്രായം ഉയര്‍ത്തില്ലെന്ന് സര്‍ക്കാര്‍ വ്യക്തമാക്കുമ്പോഴാണ് കെ.ആര്‍.എസ് ബാധകമായ ജീവനക്കാരുടെ പെന്‍ഷന്‍ പ്രായം 56ല്‍ നിന്ന് 58 ഉം കടന്ന് 60ല്‍ തൊട്ടിരിക്കുന്നത്. സംസ്ഥാന സര്‍ക്കാര്‍ ജീവനക്കാരുടെയും അധ്യാപകരുടെയും പെന്‍ഷന്‍ പ്രായം 56 വയസാണെങ്കിലും ഇ.പി.എഫ് ബാധകമാക്കിയിട്ടുള്ള പൊതുമേഖലാ സ്ഥാപനങ്ങളായ ബെവ്‌കോയിലും കാഷ്യൂ കോര്‍പറേഷനിലും മത്സ്യ തൊഴിലാളി ക്ഷേമനിധി ബോര്‍ഡിലും ഇപ്പോള്‍ ജീവനക്കാരുടെ പെന്‍ഷന്‍ പ്രായം 58 ആണ്. ഇതിനെയെല്ലാം മറികടന്നാണ് കര്‍ഷക തൊഴിലാളി ക്ഷേമനിധി ബോര്‍ഡില്‍ പെന്‍ഷന്‍ പ്രായം 60 ആക്കിയിരിക്കുന്നത്. സര്‍ക്കാര്‍ ഡോക്ടര്‍മാരുടെ പെന്‍ഷന്‍ പ്രായത്തിന് സമാനമാണിത്.
ആരോഗ്യവകുപ്പിലെയും മെഡിക്കല്‍ വിദ്യാഭ്യാസ വകുപ്പിലേയും ഡോക്ടര്‍മാരുടെ പെന്‍ഷന്‍ പ്രായം നേരത്തെ എല്‍.ഡി.എഫ് സര്‍ക്കാര്‍ വര്‍ധിപ്പിച്ചിരിന്നു. ആരോഗ്യ വകുപ്പിലെ ഡോക്ടര്‍മാരുടെ പെന്‍ഷന്‍ പ്രായം 56 ല്‍ നിന്നും 60 ഉം മെഡിക്കല്‍ വിദ്യാഭ്യാസ വകുപ്പിലെ ഡോക്ടര്‍മാരുടെ പെന്‍ഷന്‍ പ്രായം 60 ല്‍ നിന്നും 62 ആക്കിയുമാണ് വര്‍ധിപ്പിച്ചിരുന്നത്. പരിചയ സമ്പന്നരായ ഡോക്ടര്‍മാരുടെ ദൗര്‍ലഭ്യം ആരോഗ്യ മേഖലയെ പ്രതികൂലമായി ബാധിക്കുന്നത് കണക്കിലെടുത്താണപന്‍ഷന്‍ പ്രായം ഉയര്‍ത്താന്‍ തീരുമാനിച്ചതെന്നായിരുന്നു അന്ന് സര്‍ക്കാരും എല്‍.ഡി.എഫും വ്യക്തമാക്കിയിരുന്നത്. ഇതിനു പിന്നാലെയാണ് കെ.ആര്‍.എസ് ബാധകമായ ചില ജീവനക്കാരുടെ പെന്‍ഷന്‍ പ്രായവും ഇപ്പോള്‍ 60 വയസായി വര്‍ധിപ്പിച്ചിരിക്കുന്നത്.
കേരളാ കര്‍ഷക തൊഴിലാളി ക്ഷേമനിധി ബോര്‍ഡില്‍ എപ്ലോയ്‌മെന്റ് എക്‌സ്‌ചേഞ്ച് മുഖേന താല്‍ക്കാലിക നിയമനം നേടുകയും പിന്നീട് സ്ഥിരപ്പെടുത്തുകയും ചെയ്ത അംഗപരിമിതമായ ജീവനക്കാരുടെ വിരമിക്കല്‍ പ്രായമാണ് ഇപ്പോള്‍ 56 ല്‍ നിന്നും 60 ആക്കിയത്. സ്ഥിരം ജീവനക്കാരാണെങ്കിലും ഇവര്‍ക്ക് ഇ.പി.എഫ് പെന്‍ഷന്‍ പദ്ധതിയായിരുന്നു സര്‍ക്കാര്‍ ബാധകമാക്കിയിരുന്നത്. 1995ലെ ഇ.പി.എഫ് പെന്‍ഷന്‍ പദ്ധതി പ്രകാരം പെന്‍ഷന്‍ ലഭിക്കുന്നതിന് 58 വയസ് വരെ വിഹിതം അടക്കുകയും 10 വര്‍ഷത്തെ സര്‍വിസ് പൂര്‍ത്തീകരിക്കുകയും വേണം.
എന്നാല്‍ 2013 ഏപ്രില്‍ ഒന്നിന് മുന്‍പ് സ്ഥിര നിയമനം ലഭിച്ച ഇവരില്‍ പലര്‍ക്കും 56 -ാം വയസില്‍ വിരമിച്ചാല്‍ ഈ പെന്‍ഷന്‍ പദ്ധതിയുടെ ആനുകൂല്യങ്ങള്‍ ലഭിക്കില്ല. ഈ സാഹചര്യത്തിലാണ് ഇവരുടെ പെന്‍ഷന്‍ പ്രായം 60 വയസാക്കി ഉയര്‍ത്തിയത്. കര്‍ഷക തൊഴിലാളി ക്ഷേമനിധി ബോര്‍ഡില്‍ ആകെ 28 സ്ഥിരം ജീവനക്കാരാണുള്ളത്.
പ്രതിസന്ധിയിലായ കെ.എസ്.ആര്‍.ടി.സിയില്‍ പെന്‍ഷന്‍ പ്രായം 56 ല്‍ നിന്ന് 60 ആക്കി ഉയര്‍ത്തണമെന്ന ആവശ്യം ഉയര്‍ന്നിരുന്നുവെങ്കിലും ചില മന്ത്രിമാര്‍ തന്നെ എതിര്‍ത്തതോടെ ഇത് നടന്നിരുന്നില്ല. കെ.എസ്.ആര്‍.ടി.സിയില്‍ പെന്‍ഷന്‍ പ്രായം കൂട്ടിയാല്‍ സര്‍ക്കാരിന് മറ്റ് വകുപ്പുകളിലും പൊതുമേഖലാ സ്ഥാപനങ്ങളിലും ഇതേ തീരുമാനം വേണ്ടി വരുമെന്ന് മന്ത്രിമാര്‍ അഭിപ്രായപ്പെട്ടതിനെ തുടര്‍ന്നാണ് ഇക്കാര്യം ശുപാര്‍ശ ചെയ്യുന്ന പ്രൊഫ.സുശീല്‍ഖന്നയുടെ റിപ്പോര്‍ട്ട് പരിഗണിക്കാതിരുന്നത്.