കോട്ടയം: കോട്ടയം ഈരാറ്റുപേട്ടയില്‍ ദമ്പതികളെ മരിച്ച നിലയില്‍ കണ്ടെത്തി. പനയ്ക്കപ്പാലത്ത് ഇവര്‍ താമസിച്ചിരുന്ന വാടകവീട്ടിലാണ് ദമ്പതികളെ മരിച്ച നിലയില്‍ കണ്ടെത്തിയത്. രാമപുരം രാധാഭവനില്‍ വിഷ്ണു എസ്. നായര്‍ (36), ഭാര്യ രശ്മി സുകുമാരന്‍ (35) എന്നിവരെയാണ് മരിച്ച നിലയില്‍ കണ്ടെത്തിയത്. കെട്ടിപ്പിടിച്ചു കിടക്കുന്ന നിലയിലായിരുന്നു മൃതദേഹം.

ALSO READ: പഠിപ്പു മുടക്കിന്റെ പേര് പറഞ്ഞ് എസ്.എഫ്.ഐ സമ്മേളനത്തിന്റെ റാലിയില്‍ പങ്കെടുക്കാന്‍ വിദ്യാര്‍ഥികളെ സ്‌കൂളില്‍ നിന്ന് ഇറക്കിക്കൊണ്ടു പോയതായി പരാതി- റിപ്പോര്‍ട്ട്

കൈകള്‍ ടേപ്പ് ഉപയോഗിച്ച് ബന്ധിച്ച നിലയിലായിരുന്നു ദമ്പതികളുടെ മൃതദേഹം കണ്ടെത്തിയത്. ഇത് സിറിഞ്ച് ടേപ്പ് ആണെന്നാണ് പൊലിസ് നിഗമനം.

ഈരാറ്റുപേട്ടയിലെ സണ്‍റൈസ് ഹോസ്പിറ്റലിലെ നഴ്‌സിങ് സൂപ്രണ്ടായിരുന്നു മരിച്ച രശ്മി. കരാര്‍ പണികള്‍ ഏറ്റെടുത്ത് നടത്തുകയായിരുന്നു വിഷ്ണു.

കഴിഞ്ഞ ആറുമാസമായി ദമ്പതികള്‍ ഇവിടെ വാടകയ്ക്ക് താമസിച്ചു വരികയായിരുന്നു. ഇന്ന് രാവിലെ വിഷ്ണുവിന്റെ അമ്മ ഇവരെ ഫോണില്‍ വിളിച്ചിട്ട് കിട്ടിയിരുന്നില്ല. ഇതിനെ തുടര്‍ന്ന് അമ്മ ഇവര്‍ താമസിച്ചിരുന്ന വാടകവീട്ടിലേക്ക് എത്തുകയായിരുന്നു. വീടിന്റെ വാതില്‍ തുറന്നുകിടക്കുന്നതാണ് ഇവിടെ എത്തിയ വിഷ്ണുവിന്റെ അമ്മ കണ്ടത്.

എന്നാല്‍ കിടപ്പുമുറി അകത്തു നിന്നും പൂട്ടിയ നിലയിലായിരുന്നു. ദമ്പതികളുടെ മൃതദേഹങ്ങള്‍ക്ക് സമീപത്തു നിന്നും സിറിഞ്ച് കണ്ടെത്തിയിരുന്നു. ഇരുവരും ആത്മഹത്യ ചെയ്തതാണെന്നാണ് നിഗമനം. 

കടതുരുത്തിയിലെ ബ്ലേഡ് മാഫിയയില്‍ ഉള്‍പ്പെട്ട യുവാക്കള്‍ ഇന്നലെ രാവിലെ വീട്ടിലെത്തി വിഷ്ണുവിനെ മര്‍ദിച്ചെന്നും ജോലിയുടെ ഭാഗമായി രശ്മി താമസിക്കുന്ന ഹോസ്റ്റലില്‍ എത്തി അവഹേളിച്ചെന്നും റിപ്പോര്‍ട്ടുണ്ട്.

ALSO READ: 'ക്യാപ്റ്റൻ', 'മേജർ' വിളികൾ സൈന്യത്തിൽ മതി; നേതാക്കൾക്കെതിരെ വിമർശനവുമായി യൂത്ത് കോൺഗ്രസ്‌ സംസ്ഥാന ക്യാമ്പ്

കെട്ടിട നിര്‍മാണ കരാറുകാരനായ വിഷ്ണുവിന് സാമ്പത്തിക ബാധ്യതയുണ്ടായിരുന്നു.  കോവിഡിനു ശേഷമാണ് യുവാവിന് സാമ്പത്തിക ബാധ്യതയുണ്ടായത്. തന്നാലാകും വിധം ചെറിയ കരാര്‍ ജോലികള്‍ ഏറ്റെടുത്ത് ബ്ലേഡ് മാഫിയയുടെ പലിശ തിരിച്ചടക്കുന്നതിനിടെ ഇന്നലെ സംഘം എത്തി വീണ്ടും ഭീഷണി മുഴക്കുകയായിരുന്നു. യൂത്ത് കോണ്‍ഗ്രസ് രാമപുരം മുന്‍ മണ്ഡലം പ്രസിഡന്റായിരുന്നു വിഷ്ണു.