അങ്ങാടിപ്പുറം: റെയില്‍ പാളത്തിലൂടെയുള്ള യാത്ര അപകടം ക്ഷണിച്ചു വരുത്തുന്നു. ട്രെയിന്‍ തൊട്ടടുത്ത് എത്തുമ്പോഴെ മാറൂ എന്ന വാശിയിലാണു ഒരു കൂട്ടം വിദ്യാര്‍ഥികള്‍.
അങ്ങാടിപ്പുറം റയില്‍ പാളത്തിനു സമീപമുള്ള സ്ഥിരം കാഴ്ചകളിലൊന്നാണിത്. നാട്ടിലെ പ്രധാന വിദ്യാലയത്തിലെ വിദ്യാര്‍ഥികളാണിവര്‍. ഭൂരിപക്ഷം വിദ്യാര്‍ഥികളും പാതയുണ്ടെങ്കിലും റെയില്‍ പാളത്തിലൂടെ നടക്കൂ എന്ന വാശിയിലാണ്. പാളത്തിനു പുറത്തൂടെ നടക്കാന്‍ സൗകര്യം ഉണ്ടായിട്ടും പാളത്തിന് മുകളില്‍ കൈ കോര്‍ത്തു നടക്കുന്നതാണ് വിദ്യാര്‍ഥികള്‍ക്കു ഹരം. ട്രെയിന്‍ ചൂളം വിളിക്കുന്നതു ദൂരെ നിന്നു കേട്ടാലും ഇവര്‍ക്കു കുലുക്കമില്ല. തൊട്ടു,തൊട്ടില്ല എന്ന മട്ടില്‍ ട്രെയിന് അടുത്തെത്തുമ്പോള്‍ വെളിയിലേക്ക് ചാടും.
വിദ്യാര്‍ഥികളെ നിയന്ത്രിക്കാന്‍ ആരും ഇല്ലാത്തത് കൊണ്ടും ഇതൊരു സ്ഥിരം പരപാടിയായി മാറിയിരിക്കുകയാണ്. അധ്യാപകരും രക്ഷാകര്‍ത്താക്കളും ഇക്കാര്യത്തില്‍ മാര്‍ഗനിര്‍ദ്ദേശം നല്‍കിയില്ലെങ്കില്‍ അപകടം ക്ഷണിച്ചു വരുത്തുന്നതിനു തുല്യമാകും അത്.