പുത്തന്‍ചിറ: ഗ്രാമപഞ്ചായത്തിലെ പിണ്ടാണി വാര്‍ഡില്‍ നടക്കുന്ന ഉപതെരഞ്ഞെടുപ്പില്‍ ശക്തിതെളിയിക്കാന്‍ യു.ഡി.എഫും ബി.ജെ.പിയും പോരാടുമ്പോള്‍ എല്‍.ഡി.എഫ് സീറ്റ് നിലനിര്‍ത്താന്‍ പൊരുതുന്നു. പിണ്ടാണി വാര്‍ഡില്‍നിന്നു വിജയിച്ച സി.പി.ഐയിലെ മോഹനന്‍ മരിച്ച ഒഴിവിലേക്കാണ് ഉപതെരഞ്ഞെടുപ്പ് നടക്കുന്നത്.
എല്‍.ഡി.എഫിനും യു.ഡി.എഫിനും ഉപതെരഞ്ഞെടുപ്പ് ഏറെ നിര്‍ണായകമാണ്. ഇരുമുന്നണികള്‍ക്കും തുല്യ അംഗങ്ങള്‍ ഉണ്ടായിരുന്നപ്പോള്‍ സി.പി.എം വിട്ട് സ്വതന്ത്രനായി മത്സരിച്ചു വിജയിച്ച കെ. സുജിത്ത്‌ലാല്‍ പ്രസിഡന്റ് സ്ഥാനത്തെത്തുകയായിരുന്നു. 14 അംഗ ഭരണസമിതിയില്‍ ആറുവീതം അംഗങ്ങള്‍ ഇരുപക്ഷത്തുമുണ്ടായിരുന്നിട്ടും പ്രസിഡന്റ് സ്ഥാനം ലഭിച്ചില്ല. യു.ഡി.എഫിന് ആറും എല്‍.ഡി.എഫിന് യു.ഡി.എഫ് വിമതന്‍ എം.പി സോണി അടക്കം ആറും പേരുടെ പിന്തുണയുണ്ടായിരുന്നു. തുടക്കത്തില്‍ എം.പി സോണിയെ എല്‍.ഡി.എഫ് പ്രസിഡന്റ് സ്ഥാനത്തെത്തിച്ചു. തുടര്‍ന്ന് അവിശ്വാസ പ്രമേയത്തിലൂടെ എം.പി സോണിയെ യു.ഡി.എഫ് പുറത്താക്കി പ്രതികാരം തീര്‍ത്തു. ഇതോടെ കോണ്‍ഗ്രസില്‍ കടുത്ത ചേരിതിരിവ് പ്രകടമായിരുന്നു.
പഞ്ചായത്തംഗമായിരിക്കേ മരിച്ച മോഹനന്റെ മകന്‍ മഹേഷ് മോഹനാണ് എല്‍.ഡി.എഫ് സ്ഥാനാര്‍ഥി. അതേസമയം കഴിഞ്ഞ തെരഞ്ഞെടുപ്പില്‍ 12 വോട്ടിന്റെ വ്യത്യാസത്തില്‍ പരാജയപ്പെട്ട ജനതാദള്‍-യുവിന്റെ പി.സി ബാബു തന്നെയാണ് ഇത്തവണയും യു.ഡി.എഫ് സ്ഥാനാര്‍ഥി. ഇരുമുന്നണികള്‍ക്കും വെല്ലുവിളിയായി ബി.ജെ.പി സ്ഥാനാര്‍ഥി പ്രജീഷും മത്സരരംഗത്തുണ്ട്. വിജയിച്ചാല്‍ ഏഴ് അംഗങ്ങളുമായി തുല്യത പാലിച്ചു വിമതനായ എം.പി സോണിയെ ഒപ്പം നിര്‍ത്തി ഭരണം പിടിക്കാനും യു.ഡി.എഫില്‍ നീക്കമുണ്ടാകുമെന്നാണു സൂചന.
പിണ്ടാണിയില്‍ യു.ഡി.എഫ് തെരഞ്ഞെടുപ്പുയോഗം ജനതാദള്‍ യുനൈറ്റഡ് സംസ്ഥാന സെക്രട്ടറി ജനറല്‍ ഷെയ്ക്ക് പി. ഹാരിസ് ഉദ്ഘാടനം ചെയ്തു. യു.ഡി.എഫ് മണ്ഡലം പ്രസിഡന്റ് വി.എ നദീര്‍ അധ്യക്ഷനായി. ടി.എം നാസര്‍, കെ.സി വര്‍ഗീസ്, എം.എച്ച് ഫൈസല്‍, ടി.ഡി ഡേവിസ്, എ.എ അഷ്‌റഫ്, പി.ഐ നിസാര്‍, മാനാത്ത് രാജേന്ദ്രന്‍, വി.എ അബ്ദുല്‍ കരീം, മേജോ തോമസ്, സുഹറ കരീം, കെ.ഐ നജീബ്, പി.ഡി ജോസ്, കെ.എസ് പരീത്, സ്ഥാനാര്‍ഥി പി.സി ബാബു സംസാരിച്ചു.