ന്യൂഡല്‍ഹി: അമേരിക്കയ്‌ക്കെതിരായ ഇറാന്റെ തിരിച്ചടിയോടെ പശ്ചിമേഷ്യയില്‍ യുദ്ധസമാനമായ സാഹചര്യം ഉടലെടുത്തതോടെ മേഖലയിലെ ഇന്ത്യയ്ക്കാരായ പ്രവാസികളുടെ സുരക്ഷ സംബന്ധിച്ച ആശങ്കയില്‍ ഇന്ത്യ. അടിയന്തിര സാഹചര്യമുണ്ടായാലല്ലാതെ ഇറാഖിലേക്ക് പോകരുതെന്ന് വിദേശകാര്യമന്ത്രാലയം ഇന്ത്യന്‍ പൗരന്‍മാര്‍ക്ക് മുന്നറിയിപ്പ് നല്‍കി.
എട്ട് മില്യന്‍ ഇന്ത്യക്കാരാണ് പശ്ചിമേഷ്യയില്‍ ജോലി ചെയ്യുന്നത്. ഇവരില്‍ ഭൂരിഭാഗവും ഗള്‍ഫ് മേഖലയിലാണ്. തങ്ങളെ ആക്രമിക്കാന്‍ അമേരിക്കയെ സഹായിക്കുന്ന ഗള്‍ഫ് രാജ്യങ്ങളെയും ആക്രമിക്കുമെന്ന് ഇറാന്‍ ഗള്‍ഫ് രാജ്യങ്ങള്‍ മുന്നറിയിപ്പ് നല്‍കിയിട്ടുണ്ട്. നിലവില്‍ ഖത്തറും ഒമാനും മാത്രമാണ് ഇറാനുമായി സൗഹൃദം പുലര്‍ത്തുന്നത്.
മേഖലയിലെ സാഹചര്യങ്ങള്‍ സംബന്ധിച്ച് കേന്ദ്രം സൂക്ഷ്മമായി നിരീക്ഷിച്ചുവരികയാണെന്ന് വിദേശകാര്യമന്ത്രാലയം അറിയിച്ചു. ജോര്‍ദ്ദാന്‍, ഒമാന്‍, ഖത്തര്‍, ഫ്രാന്‍സ്, യു.എ.ഇ എന്നീ രാജ്യങ്ങളിലെ വിദേശകാര്യമന്ത്രിമാരുമായും ഇറാന്റെ വിദേശകാര്യമന്ത്രിയുമായും വിദേശകാര്യ മന്ത്രി എസ് ജയശങ്കര്‍ സംസാരിച്ചു. അമേരിക്കന്‍ സ്റ്റേറ്റ് സെക്രട്ടറിയുമായും സംസാരിച്ചിട്ടുണ്ട്. അടുത്ത ദിവസം ഇറാന്‍ വിദേശകാര്യമന്ത്രി ജവാദ് സരീഫ് ഇന്ത്യയിലെത്തുന്നുണ്ട്. ഇന്ത്യയുടെ ആശങ്ക അദ്ദേഹവുമായി വിദേശകാര്യമന്ത്രാലയം പങ്കുവയ്ക്കും.
അതേസമയം യുദ്ധവെറിയുള്ള രാജ്യമല്ല ഇറാനെന്ന് ഇന്ത്യയിലെ ഇറാന്‍ അംബാസഡര്‍ അലി ചെഗേനി പറഞ്ഞു. ഇപ്പോള്‍ നടത്തിയ ആക്രമണങ്ങള്‍ ഇറാന്റെ സുരക്ഷയ്ക്ക് വേണ്ടിയുള്ളതാണ്. സമാധാനത്തോടെ ജീവിക്കുകയായിരുന്നു തങ്ങള്‍. യുദ്ധസാഹചര്യം ഒഴിവാക്കാന്‍ ഇന്ത്യ നടത്തുന്ന ശ്രമങ്ങളെ വിലമതിക്കുന്നു. നല്ല സുഹൃത്തിന്റെ ശ്രമങ്ങളെ സ്വാഗതം ചെയ്യുമെന്നും ഇറാന്‍ അംബാസഡര്‍ പറഞ്ഞു.