തിരുവനന്തപുരം: തീവണ്ടി യാത്രയ്ക്കിടെ മേഘാലയ സ്വദേശിനിയെ പീഡിപ്പിക്കാന്‍ ശ്രമിച്ച കേസില്‍ പൊലിസ് കസ്റ്റഡിയിലെടുത്ത ജവാന്റെ അറസ്റ്റ് രേഖപ്പെടുത്തി. ഷില്ലോങ്ങില്‍ അസം റൈഫിള്‍സിലെ ജവാനായ അമ്പലപ്പുഴ സ്വദേശി സിംസനാണ് (32) അറസ്റ്റിലായത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
ഇന്നലെ രാവിലെ റെയില്‍വേ പൊലിസ് സ്‌റ്റേഷനില്‍ നടത്തിയ തിരിച്ചറിയല്‍ പരേഡില്‍ പ്രതിയെ യുവതി തിരിച്ചറിഞ്ഞു. തുടര്‍ന്നാണ് അറസ്റ്റ് രേഖപ്പെടുത്തിയത്. കഴിഞ്ഞ വെള്ളിയാഴ്ചയാണ് കേസിനാസ്പദമായ സംഭവം. തിരുവനന്തപുരത്ത് വീട്ടുജോലിനോക്കുന്ന മുപ്പതുകാരി നാട്ടില്‍ പോയശേഷം ഗുവാഹത്തി എക്‌സ്പ്രസില്‍ മടങ്ങിവരുന്നതിനിടെയായിരുന്നു സംഭവം.
എ.സി ടൂ ടയര്‍ ബോഗിയിലെ യാത്രക്കാരിയായ യുവതിയെ ആ ബോഗിയിലുണ്ടായിരുന്ന സിംസന്‍ അപമാനിച്ചതായാണ് പരാതി. ആദ്യ രണ്ട് ദിവസങ്ങളില്‍ യുവതിയോട് മോശമായി പെരുമാറിയ യുവാവ്, 17ന് പുലര്‍ച്ചെ യുവതി ഉറങ്ങിക്കിടക്കവെ തൊട്ടടുത്ത ബെര്‍ത്തിലിരുന്ന് കടന്നുപിടിക്കാന്‍ ശ്രമിച്ചു.
യുവതി ഉറക്കമുണര്‍ന്ന് ബഹളം വച്ചെങ്കിലും മറ്റാരും സഹായത്തിനെത്തിയില്ല. എതിര്‍ത്തിട്ടും ഇയാള്‍ പിന്‍മാറിയില്ലെന്ന് യുവതി പരാതിയില്‍ പറയുന്നു. എറണാകുളമെത്തിയപ്പോള്‍ ഇയാള്‍ ട്രെയിനില്‍ നിന്നിറങ്ങി. തിരുവനന്തപുരത്തെത്തിയ യുവതി താന്‍ ജോലി ചെയ്യുന്ന വീട്ടുകാരോട് വിവരം പറഞ്ഞു. ഇവരുടെ നിര്‍ദേശാനുസരണമാണ് പൊലിസില്‍ പരാതി നല്‍കിയത്.
സെക്കന്‍ഡ് എ.സി കമ്പാര്‍ട്ട്‌മെന്റില്‍ സിംസന്‍ യാത്രചെയ്ത ബെര്‍ത്ത് യുവതി പൊലിസിന് കാട്ടിക്കൊടുക്കുകയും ചെയ്തു. തുടര്‍ന്ന് ഐ.ആര്‍.സി.ടി.സി മുഖേന യാത്രക്കാരുടെ പട്ടിക പരിശോധിച്ചപ്പോഴാണ് ജവാനാണ് അക്രമിയെന്ന് കണ്ടെത്തിയത്.
അമ്പലപ്പുഴ സ്വദേശിയായ ഇയാള്‍ നാട്ടില്‍ അവധിക്ക് വരുന്നതിനിടെയാണ് അതിക്രമം കാട്ടിയത്. ഇയാളെ ഞായറാഴ്ച രാത്രിയോടെ പൊലിസ് കസ്റ്റഡിയിലെടുത്തിരുന്നു.