കോഴിക്കോട്: ഹെല്‍മറ്റ് വേട്ടയ്ക്കിടെ മോട്ടോര്‍ വാഹന വകുപ്പ് ഉദ്യോഗസ്ഥന്‍ നടത്തിയ പരാക്രമത്തില്‍ ബൈക്കില്‍ നിന്നു താഴെ വീണ് പിറകിലിരുന്ന 10ാം ക്ലാസ് വിദ്യാര്‍ഥിക്ക് പരുക്കേറ്റു. പാലാഴി സ്വദേശി ദയാനന്ദന്റെ മകനും മെഡിക്കല്‍ കോളജ് കാംപസ് എച്ച.്എസ്.എസിലെ 10ാം ക്ലാസ് വിദ്യാര്‍ഥിയുമായ നീരജി(14)നാണ് പരുക്കേറ്റത്.
ഇന്നലെ രാവിലെ 9.45ഓടെ ചേവായൂര്‍ എം.എല്‍.എ റോഡിലാണ് സംഭവമുണ്ടായത്. എം.വി.ഐ സിജുവിന്റെ നേതൃത്വത്തില്‍ രാവിലെ ഹെല്‍മറ്റ് പരിശോധനയ്ക്ക് റോഡില്‍ മോട്ടോര്‍ വാഹന വകുപ്പിന്റെ സ്‌ക്വാഡ് നിലയുറപ്പിച്ചിരുന്നു. ഇതിനിടെയാണ് നീരജ് സഞ്ചരിച്ച ബൈക്ക് അതുവഴി വന്നത്.
ഉദ്യോഗസ്ഥര്‍ കൈ കാണിച്ചെങ്കിലും ഹെല്‍മറ്റ് ധരിക്കാത്തത് കാരണം ബൈക്ക് ഓടിച്ചയാള്‍ നിര്‍ത്താന്‍ കൂട്ടാക്കിയില്ല. തുടര്‍ന്ന് സ്‌ക്വാഡിലെ ഒരംഗം ബൈക്കിന്റെ പിന്‍സീറ്റിലിരുന്ന നീരജിന്റെ ഷര്‍ട്ട് പിടിച്ചു വലിച്ചു നിലത്തിടുകയായിരുന്നുവത്രെ.
ലിഫ്റ്റ് ചോദിച്ച് യാത്ര ചെയ്യുകയായിരുന്നതിനാല്‍ വാഹനമോടിച്ചയാള്‍ നിര്‍ത്താതെ പോകുകയും ചെയ്തു. താഴെ വീണ് പരുക്കേറ്റ നീരജിനെ ആശുപത്രിയിലെത്തിക്കാതെ തടിയൂരാനാണ് ഉദ്യോഗസ്ഥര്‍ ശ്രമിച്ചതെന്ന് ദൃക്‌സാക്ഷികള്‍ പറഞ്ഞു.
തുടര്‍ന്ന് നാട്ടുകാര്‍ സംഘടിച്ചതോടെയാണ് വിദ്യാര്‍ഥിയെ മെഡിക്കല്‍ കോളജില്‍ പ്രവേശിപ്പിച്ചത്. കൈക്ക് പരുക്കേറ്റതിനെ തുടര്‍ന്ന് നീരജിന് ഇന്നലെ നടന്ന സോഷ്യല്‍ സ്റ്റഡീസ് മോഡല്‍ പരീക്ഷ എഴുതാന്‍ സാധിച്ചില്ല.
അതേസമയം, സംഭവത്തെ കുറിച്ചുള്ള റിപ്പോര്‍ട്ട് ട്രാന്‍സ്‌പോര്‍ട്ട് കമ്മിഷണര്‍ക്ക് നല്‍കിയതായി ആര്‍.ടി.ഒ പോള്‍സന്‍ പറഞ്ഞു. ആരോപണ വിധേയനായ ഉദ്യോഗസ്ഥനെ സ്‌ക്വാഡില്‍ നിന്നും നീക്കിയതായും അദ്ദേഹം പറഞ്ഞു.