മാവൂര്‍: 'സഹനം, സമരം, സമര്‍പ്പണം' പ്രമേയത്തില്‍ എസ്.കെ.എസ്.എസ്.എഫ് നടത്തുന്ന റമദാന്‍ കാംപയിനിന്റെ ഭാഗമായി മാവൂര്‍ സി.ഐ.ടി.യു ഗ്രൗണ്ടില്‍ നടക്കുന്ന റമദാന്‍ പ്രഭാഷണത്തിനു നാളെ തുടക്കമാവും. 11, 12, 13, 14, 15, 18, 19 തിയതികളിലാണു പ്രഭാഷണ പരമ്പര നടക്കുന്നത്. എല്ലാ ദിവസവും രാവിലെ 8.30 മുതല്‍ രണ്ടു മണിക്കൂര്‍ നേരമാണു പ്രഭാഷണ പരിപാടി.
നാളെ രാവിലെ 8.30ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ പ്രഭാഷണ പരമ്പര ഉദ്ഘാടനം ചെയ്യും. മുന്‍ മന്ത്രി ഡോ. എം.കെ മുനീര്‍ മുഖ്യാതിഥിയാകും. 'ഉമ്മ പ്രിയപ്പെട്ട ഉമ്മ' വിഷയത്തില്‍ അന്‍വര്‍ മുഹ്‌യിദ്ദീന്‍ ഹുദവി ആലുവ പ്രഭാഷണം നടത്തും.
തുടര്‍ന്നുള്ള ദിവസങ്ങളില്‍ ഖലീല്‍ ഹുദവി കാസര്‍കോട്, റഹ്മത്തുല്ല ഖാസിമി മൂത്തേടം എന്നിവര്‍ പ്രഭാഷണം നടത്തും. വിവിധ ദിവസങ്ങളില്‍ സമസ്ത ട്രഷറര്‍ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍, പാണക്കാട് സയ്യിദ് അബ്ബാസലി ശിഹാബ് തങ്ങള്‍, പാണക്കാട് സയ്യിദ് റഷീദലി ശിഹാബ് തങ്ങള്‍, പാണക്കാട് സയ്യിദ് സാബിഖലി ശിഹാബ് തങ്ങള്‍, കോട്ടുമല ടി.എം ബാപ്പു മുസ്‌ലിയാര്‍, ചേലക്കാട് മുഹമ്മദ് മുസ്‌ലിയാര്‍, ഇ.ടി മുഹമ്മദ് ബഷീര്‍ എം.പി, പി.വി അബ്ദുല്‍ വഹാബ് എം.പി, പി.ടി.എ റഹീം എം.എല്‍.എ, അഡ്വ. ടി. സിദ്ദീഖ് സംബന്ധിക്കും.
19നു നടക്കുന്ന സമാപന ചടങ്ങില്‍ പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനാകും. സമസ്ത കേന്ദ്ര മുശാവറ അംഗം വാവാട് കുഞ്ഞിക്കോയ മുസ്‌ലിയാര്‍ ദിക്ര്‍ ദുആ മജ്‌ലിസിനു നേതൃത്വം നല്‍കും. സ്ത്രീകള്‍ ഉള്‍പ്പെടെ ആയിരങ്ങള്‍ക്ക് ഇരുന്നുപ്രസംഗം കേള്‍ക്കാനുള്ള സൗകര്യം ഒരുക്കിയിട്ടുണ്ട്. എല്‍.സി.ഡി സ്‌ക്രീനും സജ്ജമാക്കിയിട്ടുണ്ട്.