.

തെഹ്‌റാന്‍: ഉക്രൈന്‍ വിമാനം തകര്‍ന്നുവീഴുന്നതിനു മുന്‍പ് തീപിടിച്ചിരുന്നതായി ഇറാന്‍ അന്വേഷണ സംഘം. എന്നാല്‍ പൈലറ്റ് സഹായം ആവശ്യപ്പെട്ടിരുന്നില്ലെന്നും വിമാനത്താവളത്തിലേക്ക് തിരിച്ചിറങ്ങാന്‍ ശ്രമിക്കുന്നതിനിടെയാണ് തകര്‍ന്നതെന്നും സംഘം വ്യക്തമാക്കി. അതേസമയം റഷ്യന്‍ നിര്‍മിത മിസൈലായിരിക്കാം വിമാനം തകര്‍ത്തതെന്ന് ഉക്രൈനിലെ മുതിര്‍ന്ന സുരക്ഷാ ഉദ്യോഗസ്ഥര്‍ പറഞ്ഞു. സംഭവം അന്വേഷിക്കാനായി 45 അംഗ ഉക്രൈന്‍ പ്രതിനിധി സംഘം അന്വേഷണത്തിനായി ഇന്നലെ തെഹ്‌റാനിലെത്തി.
കഴിഞ്ഞ ബുധനാഴ്ച തെഹ്‌റാനിലെ ഖുമൈനി വിമാനത്താവളത്തില്‍ നിന്നും പറന്നുയര്‍ന്ന ഉക്രൈന്‍ ഇന്റര്‍നാഷനല്‍ എയര്‍ലൈന്‍ വിമാനം തകര്‍ന്നു വീണ് 76 യാത്രക്കാര്‍ കൊല്ലപ്പെട്ടിരുന്നു.
വിമാനം പറന്നുയരുമ്പോള്‍ തീപിടിച്ചതിന് ദൃക്‌സാക്ഷികളുണ്ടെന്നും ഇറാന്‍ സിവില്‍ ഏവിയേഷന്റെ റിപ്പോര്‍ട്ടില്‍ വ്യക്തമാക്കുന്നുണ്ട്. മൂന്നുവര്‍ഷം പഴക്കമുള്ള ജറ്റ് അറ്റകുറ്റപ്പണികള്‍ക്കു മുന്‍പുള്ള അവസാന ഷെഡ്യൂളായിരുന്നു ഇത്. വിമാനത്താവളത്തില്‍ നിന്നു പറന്നുയര്‍ന്ന ഉടനെ സാങ്കേതിക തകരാര്‍ സംഭവിച്ചു. ഏത് തരത്തിലുള്ള തകരാണ് സംഭവിച്ചതെന്ന് വ്യക്തമല്ല. വിമാനം 8,000 അടി ഉയരത്തിലെത്തിയപ്പോള്‍ തന്നെ റഡാറില്‍ നിന്നും അപ്രത്യക്ഷമായിരുന്നു. പിന്നീട് പൈലറ്റില്‍ നിന്നും ആശയവിനിമയം സാധ്യമായിരുന്നില്ലെന്നും റിപ്പോര്‍ട്ടിലുണ്ട്.
വിമാനത്തിന്റെ എന്‍ജിനുകളില്‍ ഒന്ന് അമിതമായിചൂടായിരുന്നതിന് തെളിവുകള്‍ ലഭിച്ചതായി കനേഡിയന്‍ സുരക്ഷാ അധികൃതര്‍ വ്യക്തമാക്കിയതായി റോയിട്ടേഴ്‌സ് റിപ്പോര്‍ട്ട് ചെയ്തു. ബഗ്ദാദിലെ യുഎസ് സൈനിക താവളങ്ങള്‍ക്കുനേരെ ഇറാന്‍ ബാലിസ്റ്റിക് മിസൈല്‍ ആക്രമണം നടത്തി മണിക്കൂറുകള്‍ക്കു ശേഷമായിരുന്നു വിമാനം തകര്‍ന്നു വീണത്. ഇത് മിസൈല്‍ പതിച്ചാണ് വിമാനം തകര്‍ന്നതെന്ന അഭ്യൂഹങ്ങള്‍ക്കിടയാക്കിയിരുന്നു. വിമാനത്തിന് സാങ്കേതിക പ്രശ്‌നങ്ങള്‍ ഉണ്ടായിരുന്നതായും മിസൈല്‍ ആക്രമണത്തിലല്ല തകര്‍ന്നു വീണതെന്നുമാണ് പടിഞ്ഞാറന്‍ അന്വേഷണ ഏജന്‍സികളുടെയും പ്രാധമിക നിഗമനം. മൂന്ന് അമേരിക്കന്‍ ഏജന്‍സികളും ഒരു കനേഡിയന്‍, യുറോപ്യന്‍ അന്വേഷണ ഏജന്‍സിയും ഇക്കാര്യം വ്യക്തമാക്കിയതായും റോയിട്ടേഴ്‌സ് റിപ്പോര്‍ട്ട് ചെയ്തു.