തലശ്ശേരി: സി.കെ നായിഡു ട്രോഫി ചതുര്‍ദിന ക്രിക്കറ്റില്‍ ആതിഥേയരായ കേരളത്തിന് റെയില്‍വേസിനെതിരേ ഒന്‍പതു വിക്കറ്റിന്റെ തോല്‍വി. 80 റണ്‍സ് വിജയലക്ഷ്യവുമായി ഇറങ്ങിയ റെയില്‍വേസ് ഒരുവിക്കറ്റ് നഷ്ടത്തില്‍ വിജയ ലക്ഷ്യം നേടുകയായിരുന്നു. 36 റണ്‍സോടെ കരണ്‍ ശര്‍മയും 33 റണ്‍സോടെ എ. റാമും പുറത്താകാതെ നിന്നു.

മൂന്നാം ദിവസത്തെ സ്‌കോറായ മൂന്നുവിക്കറ്റ് നഷ്ടത്തില്‍ 201 റണ്‍സ് എന്ന നിലയില്‍ ബാറ്റിങ് പുനരാരംഭിച്ച കേരളം 292 റണ്‍സിന് എല്ലാവരും പുറത്താവുകയായിരുന്നു. കേരളത്തിനായി ഡാരില്‍ എസ്. ഫെരാരിയോ 88 റണ്‍സും ക്യാപ്റ്റന്‍ സല്‍മാന്‍ നിസാര്‍ 58 റണ്‍സുമെടുത്തു. റെയില്‍വേസിനായി ഹര്‍ഷ് ത്യാഗി 65 റണ്‍സിനു നാലു വിക്കറ്റും മായങ്ക് സിങ് 56 റണ്‍സിനു രണ്ടു വിക്കറ്റും വീഴ്ത്തി. സ്‌കോര്‍: കേരളം-284, 292. റെയില്‍വേസ്: 497, 82ന് 1. ഏഴു മത്സരത്തില്‍ നിന്നു 19 പോയിന്റുമായി ഗ്രൂപ്പില്‍ അഞ്ചാമതാണു കേരളം. 29 പോയിന്റോടെ ഗ്രൂപ്പില്‍ രണ്ടാമതാണ് റെയില്‍വേസ്. കേരളത്തിന്റെ അടുത്ത മത്സരം ഒന്‍പതു മുതല്‍ 12 വരെ ജമ്മുവില്‍ ജമ്മു കശ്മിരുമായി നടക്കും.