കൂടരഞ്ഞി: പൂവാറന്‍തോട് തമ്പുരാന്‍കൊല്ലി മലയോര മേഖലയില്‍ കൃഷിയിടത്തില്‍ കാട്ടാനക്കൂട്ടമിറങ്ങി വാഴകള്‍ നശിപ്പിച്ചു. ഏത്തവാഴ തോട്ടമാണ് കഴിഞ്ഞ മൂന്നുദിവസങ്ങളിലായി കാട്ടാനക്കൂട്ടം നശിപ്പിച്ചത്. ഇടവനപ്പറമ്പില്‍ മാത്യു, കാരക്കട ഷാജന്‍ എന്നിവരുടെ വാഴത്തോട്ടമാണു വ്യാപകമായി നശിപ്പിച്ചത്.
കുട്ടിയാന അടക്കം ആറ് ആനകള്‍ നിലമ്പൂര്‍ വനത്തിലെ തമ്പുരാന്‍കൊല്ലി വനമേഖലയില്‍ നിന്നാണ് എത്തിയത്. കൃഷിയിടങ്ങളോട് ചേര്‍ന്നുള്ള വനപ്രദേശത്തു കാട്ടാനക്കൂട്ടം പകല്‍ സമയങ്ങളില്‍ തമ്പടിച്ചിരിക്കുകയാണ്. രാത്രികാലങ്ങളില്‍ കൂട്ടമായി ഇവ കൃഷിഭൂമിയില്‍ മേഞ്ഞുനടക്കുകയാണു പതിവ്.
വനപാലകരെ വിവരം അറിയിച്ചാല്‍ ആവശ്യമായ നടപടികള്‍ ഉണ്ടാകുന്നില്ലെന്ന് പരക്കെ പരാതിയുണ്ട്. ആനക്കൂട്ടത്തെ ഉള്‍വനങ്ങളിലേക്ക് തുരത്തി ഓടിക്കുന്നതിന് ആവശ്യമായ പ്രവര്‍ത്തനങ്ങള്‍ വേണമെന്ന് ജനങ്ങള്‍ ആവശ്യപ്പെട്ടു.