തളിപ്പറമ്പ്: പെണ്‍ സുഹൃത്തുമായി സംസാരിച്ചതിന് ക്രൂരമര്‍ദനത്തിനിരയായ യുവാവിന്റെ നില അതീവഗുരുതരം. തളിപ്പറമ്പ് കപ്പാലത്തെ പാറോല്‍ ആഷിഖി (18) നാണ് മര്‍ദനമേറ്റത്. യുവാവ് അക്രമത്തിനിരയായി രണ്ടാഴ്ചക്ക് ശേഷമാണ് വിവരം പുറത്തറിയുന്നത്.
ആഷിഖ് അതീവ ഗുരുതര നിലയില്‍ മംഗളൂരുവിലെ സ്വാകര്യ ആശുപത്രിയില്‍ ചികിത്സയില്‍ കഴിയുകയാണ്. സംഭവത്തില്‍ തളിപ്പറമ്പ് സ്വദേശി സിനാന്‍, നെല്ലിപ്പറമ്പിലെ ഇര്‍ഷാദ്, മറ്റ് കണ്ടാലറിയാവുന്ന രണ്ടുപേര്‍ എന്നിവര്‍ക്കെതിരേ തട്ടിക്കൊണ്ടു പോകല്‍, അക്രമിക്കല്‍ വകുപ്പുകള്‍ പ്രകാരം കേസെടുത്തു.
സംഭവത്തെക്കുറിച്ച് പൊലിസ് പറയുന്നത് ഇങ്ങനെ: തളിപ്പറമ്പ് കപ്പാലം സ്വദേശിയായ ആഷിഖ് കഴിഞ്ഞ 22ന് രാത്രി ഏഴ് മണിയോടെയാണ് പരിയാരം ഗ്രാമപഞ്ചായത്തിലെ നെല്ലിപ്പറമ്പിലെ പഞ്ചായത്ത് ഗ്രൗണ്ടില്‍ വച്ച് അക്രമിക്കപ്പെട്ടത്. ഗ്രൗണ്ടിന് സമീപത്തെ പെണ്‍സുഹൃത്തുമായി സംസാരിച്ചതിനെ തുടര്‍ന്നാണ് പെണ്‍കുട്ടിയുടെ ബന്ധുവടങ്ങിയ നാലംഗ സംഘം ആശിഖിനെ അക്രമിച്ചത്. പിന്നീട് കാറില്‍ക്കയറ്റി കൊണ്ടുപോയി പെണ്‍കുട്ടിയുടെ വീട്ടില്‍വച്ചും അതിക്രൂരമായി മര്‍ദിച്ചുവെന്നാണ് പൊലിസ് പറയുന്നത്.
രണ്ട് ശസ്ത്രക്രിയകള്‍ കഴിഞ്ഞിട്ടും ആഷിഖിന്റെ നില അതീവഗുരുതരമായി തുടരുകയാണ്. എസ്.ഐ കെ. ദിനേശന്റെ നേതൃത്വത്തില്‍ പൊലിസ് അന്വേഷണം ആരംഭിച്ചു.