പാലാ: നഗരസഭയില്‍ ചെയര്‍പേഴ്‌സണ്‍ ദിയ ബിനു പുളിക്കകണ്ടത്തിനെതിരേ എല്‍.ഡി.എഫ് കൊണ്ടുവന്ന അവിശ്വാസപ്രമേയം പാസായി. ഇതോടെ യു.ഡി.എഫിന് ഭരണം നഷ്ടമായി. എതിരില്ലാത്ത 17 വോട്ടിനാണ് പ്രമേയം പാസായത്. 

വിപ്പ് ലംഘിച്ച് യോഗത്തിനെത്തിയ 4 കോണ്‍ഗ്രസ് കൗണ്‍സിലര്‍മാരും വിമതയായി വിജയിച്ച മായാ രാഹുലും എല്‍.ഡി.എഫ് അവിശ്വാസത്തെ പിന്തുണച്ചു. ലിസി കുട്ടി മാത്യു, ബിജു മാത്യൂസ്, ടോണി തൈപ്പറമ്പില്‍, രജിത പ്രകാശ് എന്നിവരാണ് വിപ്പ് ലംഘിച്ച് എത്തിയത്. അതേസമയം, റിയ ചീരാംകുഴി, സെബാസ്റ്റ്യന്‍ പനക്കല്‍ എന്നീ കോണ്‍ഗ്രസ് അംഗങ്ങള്‍ ഹാജരായില്ല.

നഗരസഭയില്‍ ഭരണമുന്നണിയിലെ സ്വതന്ത്രകൂട്ടായ്മയും കോണ്‍ഗ്രസ് കൗണ്‍സിലര്‍മാരും തമ്മില്‍ തര്‍ക്കം ഉടലെടുത്തിട്ട് രണ്ടു മാസത്തോളമായി. 

ഈ സമയങ്ങളിലൊന്നുംതന്നെ എല്‍.ഡി.എഫ് അവിശ്വാസത്തിലേക്ക് നീങ്ങിയിരുന്നില്ല. എന്നാലിപ്പോള്‍ ഭരണപ്രതിസന്ധിരൂക്ഷമാണെന്നും നഗരസഭയില്‍ നല്ലൊരു ഭരണം വരാന്‍ ഇടപെടല്‍ നടത്തേണ്ടത് പ്രതിപക്ഷമെന്ന നിലയില്‍ തങ്ങളുടെ ധാര്‍മിക ഉത്തരവാദിത്വമാണെന്നുമാണ് എല്‍.ഡി.എഫ് നേതാക്കള്‍ പറയുന്നത്. പ്രതിപക്ഷ നേതാവ് ബിജു പാലുപടവനാണ് അവിശ്വാസപ്രമേയ നോട്ടിസ് നല്‍കിയത്. 

പുളിക്കകണ്ടം കുടുംബാംഗങ്ങളായ മൂന്ന് സ്വതന്ത്ര കൗണ്‍സിലര്‍മാരുടെ പിന്തുണയോടെയാണ് പാലാ നഗരസഭ യു.ഡി.എഫ് ഭരിക്കുന്നത്.

യു.ഡി.എഫിന്റെ കൗണ്‍സിലര്‍മാരായി നില്‍ക്കുന്ന സമയത്തുപോലും തങ്ങള്‍ക്ക് യാതൊരുവിധപരിഗണനയും നഗരസഭയ്ക്കകത്ത് ലഭിക്കുന്നില്ലെന്നും പുളിക്കകണ്ടം കുടുംബത്തിലെ മൂന്ന് കൗണ്‍സിലര്‍മാര്‍ ഏകാധിപത്യസ്വഭാവത്തിലാണ് കാര്യങ്ങള്‍ കൈകാര്യം ചെയ്യുന്നതെന്നും ചൂണ്ടിക്കാട്ടിയാണ് കോണ്‍ഗ്രസിലെ ആറ് അംഗങ്ങള്‍ പിന്തുണ പിന്‍വലിക്കുന്നുവെന്നറിയിച്ച് കെ.പി.സി. സിക്ക് കത്ത് നല്‍കിയിരുന്നത്.

In Pala, Diya Binu has been removed from her position after the LDF’s no-confidence motion was passed. Congress members also supported the motion, leading to the defeat of the chairperson. The political development has triggered discussions in local circles and is expected to influence the power dynamics in the municipality.