ശ്രീകണ്ഠപുരം: കാറുകള്‍ വാടകക്കെടുത്തും വിലക്ക് വാങ്ങാനെന്ന വ്യാജേനയും കൈക്കലാക്കി മറിച്ച് വില്‍ക്കുന്ന സംഘത്തിലെ പ്രധാനി ശ്രീകണ്ഠപുരത്ത് പിടിയില്‍. പരിപ്പായി താഴെവീട്ടില്‍ രാഹുലിനെ (27) ആണ് എസ്.ഐ പ്രകാശനും സംഘവും അറസ്റ്റുചെയ്തത്. ജില്ലയിലെ പല ഭാഗങ്ങളില്‍ റെന്റ് എ കാര്‍ വാടകക്കെടുത്ത് മറിച്ച് വില്‍ക്കുന്നതു പതിവാക്കിയ ആളാണ് രാഹുല്‍. വിലക്ക് വാങ്ങാനെന്ന മട്ടില്‍ വിലയുറപ്പിച്ച് ശേഷം ഓടിച്ചു നോക്കാനെന്ന് പറഞ്ഞ് കൈക്കലാക്കി മുങ്ങുകയാണ് ഇയാളുടെ രീതിയെന്നു പൊലിസ് പറഞ്ഞു.
പരിപ്പായിയിലെ കുറുംമംഗലത്ത് മഹേഷ് മോഹന്‍ നല്‍കിയ പരാതിയില്‍ കഴിഞ്ഞ ഒക്ടോബറില്‍ രാഹുലിനെതിരേ ശ്രീകണ്ഠപുരം പൊലിസ് കേസെടുത്തിരുന്നു. ഇയാളുടെ ആള്‍ട്ടോ കാര്‍ തലശ്ശേരിയിലേക്കു പോകാനെന്ന് പറഞ്ഞ് വാടകക്ക് വാങ്ങി തിരിച്ച് നല്‍കിയില്ല. അന്വേഷണത്തില്‍ പുതിയ തെരുവിലെ ഒരാള്‍ക്ക് അരലക്ഷം രൂപക്കു വിറ്റതായി മനസിലായി. ഇതറിഞ്ഞ ഐച്ചേരിയിലെ ചിരിക്കോട് ഷിബുവും രാഹുലിനെതിരേ പരാതി നല്‍കി. ഇയാളുടെ കാറും വാടകക്കെടുത്ത് ഒരു ലക്ഷം രൂപക്ക് ബക്കളത്തെ മൂന്നുപേര്‍ക്കായി മറിച്ച് വില്‍ക്കുകയായിരുന്നു. ബക്കളത്തെ ജുബൈര്‍, മുഹമ്മദലി എന്നിവരുടെ ഗോഡൗണുകളില്‍ നിന്നു രണ്ടു കാറുകളും പുതിയതെരുവിലെ ആര്‍ഷിയുടെ ഗോഡൗണില്‍ നിന്ന് ഒരു കാറും പൊലിസ് കണ്ടെടുത്തു. എന്നാല്‍ ഷിബുവിന്റെ കാര്‍ കണ്ടെത്താന്‍ കഴിഞ്ഞില്ല.