ന്യൂഡല്‍ഹി: ജെ.എന്‍.യു വൈസ് ചാന്‍സലര്‍ എം. ജഗദീഷ് കുമാറിനെ നീക്കണമെന്നും 2016 ജനുവരി 27 മുതല്‍ അദ്ദേഹം നടത്തിയ എല്ലാ നിയമനങ്ങളും സ്വതന്ത്ര ഏജന്‍സി അന്വേഷിക്കണമെന്നും ജെ.എന്‍.യുവിലെ എ.ബി.വി.പി അക്രമത്തെക്കുറിച്ച് അന്വേഷിക്കാന്‍ നിയോഗിച്ച കോണ്‍ഗ്രസ് അന്വേഷണ സമിതിയുടെ ശുപാര്‍ശ.
കാംപസില്‍ വിദ്യാര്‍ഥികള്‍ക്കെതിരേയുണ്ടായ അതിക്രമത്തിന്റെ ആസൂത്രകന്‍ വി.സിയാണെന്ന് അന്വേഷണ സമിതി കുറ്റപ്പെടുത്തി. അതോടൊപ്പം, പണം ചെലവഴിക്കുന്നതുള്‍പ്പെടെ അദ്ദേഹം നടത്തിയ എല്ലാ ഭരണപരമായ നടപടികളെക്കുറിച്ചും അന്വേഷണം വേണമെന്ന് അവര്‍ ആവശ്യപ്പെട്ടു.
സബര്‍മതി പെരിയാര്‍ ഹോസ്റ്റലില്‍ ഈ മാസം അഞ്ചിന് വിദ്യാര്‍ഥികള്‍ക്കെതിരേയുണ്ടായ അക്രമത്തില്‍ അക്രമികള്‍ക്കൊപ്പം ചേര്‍ന്ന് ഗൂഢാലോചന നടത്തിയ ജഗദീഷ് കുമാര്‍, കാംപസിന്റെ സുരക്ഷാ ചുമതലയുള്ള സെക്യൂരിറ്റി കമ്പനി എന്നിവര്‍ക്കെതിരേ ക്രിമിനല്‍ കേസെടുത്ത് അന്വേഷണം നടത്തണമെന്നും സമിതി ആവശ്യപ്പെട്ടു.
കോണ്‍ഗ്രസ് നേതാക്കളായ സുഷ്മിത ദേവ്, ഡോ. നാസിര്‍ ഹുസൈന്‍, ഹൈബി ഈഡന്‍, അഡ്വ. അമൃത ധവാന്‍ എന്നിവരടങ്ങിയ സമിതിയാണ് അന്വേഷണം നടത്തിയത്. പൊലിസ് അക്രമികളെ സഹായിച്ചുവെന്ന് പ്രഥമദൃഷ്ട്യാ വ്യക്തമാണ്. ഈ സാഹചര്യത്തില്‍ അതിന് ഉത്തരവാദികളായ ഉദ്യോഗസ്ഥരെ കണ്ടെത്തണം.
അന്യായമായി ഏര്‍പ്പെടുത്തിയ ഫീസ് വര്‍ധന പിന്‍വലിക്കണമെന്നും സമിതി ശുപാര്‍ശ ചെയ്തു. അന്വേഷണ റിപ്പോര്‍ട്ട് കോണ്‍ഗ്രസ് അധ്യക്ഷ സോണിയാ ഗാന്ധിക്ക് കൈമാറി.
അക്രമമുണ്ടായ ഈ മാസം അഞ്ചിന് ആരാണ് സെര്‍വര്‍ ഓഫ് ചെയ്തതെന്നു വ്യക്തമല്ലെന്ന് റിപ്പോര്‍ട്ട് പറയുന്നു. ഇതുമൂലം സി.സി.ടിവി ദൃശ്യങ്ങള്‍ റെക്കോര്‍ഡ് ചെയ്യാത്ത സാഹചര്യം വി.സി മുതലെടുത്തുവെന്ന് വ്യക്തമാണ്.
വൈദ്യുതി വിച്ഛേദിച്ചാണ് അക്രമം നടത്തിയത്. ഇതും അധികൃതരിലേക്ക് വിരല്‍ ചൂണ്ടുന്നതാണ്. ഇക്കാര്യവും അന്വേഷിക്കണമെന്നും സമിതി ആവശ്യപ്പെടുന്നുണ്ട്.