കിഴിശ്ശേരി: കാലങ്ങളായി രോഗത്തിന്റെ പിടിയിലമര്‍ന്ന് വീട്ടിനകത്തെ ഏകാന്തതയില്‍ കഴിഞ്ഞിരുന്നവര്‍ വേദനകള്‍ മറന്ന് ഒത്തുകൂടി. മരുന്നിന്റെയും ചികിത്സയുടേയും ലോകത്തു നിന്ന് കളിയുടേയും ചിരിയുടേയും നിമിഷങ്ങള്‍ സമ്മാനിച്ച അപൂര്‍വസംഗമം.
രോഗപൂര്‍ണമായ അവസ്ഥക്കൊപ്പം വാര്‍ധക്യത്തിന്റെ ഏകാന്തതക്കും ആടിയും പാടിയും അവര്‍ തല്‍ക്കാലം വിടനല്‍കി. മുതുവല്ലൂര്‍ പഞ്ചായത്തും സപ്പോര്‍ട്ടിങ്ങ് കമ്മറ്റിയും സംഘടിപ്പിച്ച പരിരക്ഷാ സംഗമത്തിലാണ് വിവിധ രോഗങ്ങളുടെ പിടിയിലകപ്പെട്ട് പ്രയാസം അനുഭവിക്കുന്ന അന്‍പതോളം പേര്‍ പങ്കെടുത്തത്. വിളയില്‍ പറപ്പൂര്‍ വി.പി.എ.യു.പി സ്‌കൂളില്‍ നടന്ന പരിപാടിയില്‍ പങ്കെടുത്ത അന്‍പതാള്‍ക്കും അവരുടെ അഭിരുചിക്കനുസരിച്ചുള്ള ഭക്ഷണമാണ് സംഘാടകര്‍ ഒരുക്കിയത്. ഓരോരുത്തര്‍ക്കും ഉപഹാരവും നല്‍കി. രോഗശയ്യയിലായതിന് ശേഷം പുറം ലോകവുമായുള്ള ബന്ധം നഷ്ടപ്പെട്ടവരും പൊതു ചടങ്ങുകളില്‍ പങ്കെടുക്കാത്തവരുമായ രോഗികളും അവരുടെ ബന്ധുക്കളുമായിരുന്നു പരിപാടിയിലെ പ്രധാന സാന്നിധ്യം.
മാറാരോഗങ്ങള്‍ക്ക് അടിമപ്പെട്ട കുട്ടികളും പ്രായാധിക്യ അവശതകള്‍ പോലും മറന്ന് വൃദ്ധരും ചടങ്ങിനെത്തിയിരുന്നു. അവര്‍ പരസ്പരം അനുഭവങ്ങള്‍ പങ്കുവെച്ചും ആശ്വസിപ്പിച്ചും ഡോ. സാബിറിന്റെ മേല്‍നോട്ടത്തില്‍ അവര്‍കഴിച്ചുകൂട്ടി.
മുതവല്ലൂര്‍ പഞ്ചായത്ത് പ്രസിഡന്റ് കെ.എ സഗീര്‍ ഉദ്ഘാടനം ചെയ്തു. ചീക്കോട് പഞ്ചായത്ത് പ്രസിഡന്റ് കെ.പി സഹീദ്, ജില്ലാ പഞ്ചായത്ത് മെമ്പര്‍മാരായ അഡ്വ: പി.വി മനാഫ്, സറീന ഹസീബ്, ശിഹാബ് തങ്ങള്‍ ഡയാലിസ് സെന്റര്‍ ചെയര്‍മാന്‍ പി.എ ജബ്ബാര്‍ ഹാജി, ബ്ലോക്ക് മെമ്പര്‍ ടി മരക്കാര്‍, പഞ്ചായത്ത് വൈസ് പ്രസിഡന്റ് റഹ്മ മുജീബ്, മെമ്പര്‍മാരായ മൊയ്തീന്‍ കോയ, അബദുല്ല മൗലവി, ഷഹര്‍ ബാന്‍, കെ.എന്‍ ബഷീര്‍, ബാബുരാജ്, കുമാരന്‍, കെ.ഒ രാധാകൃഷ്ണന്‍, ഷാഹിദ, സാറാബി, ഖൈറുനിസ്സ, ഷീല, ലക്ഷ്മി, സുനുമോള്‍, മെഡിക്കല്‍ ഓഫിസര്‍ ഡോ. സാബിര്‍, കെ.എ കലാം ഹാജി, കെ.വി ചെറിയാപ്പു ഹാജി, കെ.കെ മൊയ്തീന്‍ കുട്ടി, സി ഡി.എസ് ചെയര്‍പെര്‍സണ്‍ മുനീറ, എ.ടി കരീം മാസ്റ്റര്‍, എം.പി ശരീഫ ടീച്ചര്‍, കെ.കെ മുനീര്‍ മാസ്റ്റര്‍, സി.പി ശശി, കെ.പി സത്യനാഥന്‍, ഡി സാജിദ്, ബെന്ന സാഹിബ്, റഷീദ്, രവി സംസാരിച്ചു.