മാച്ചിലില്‍ തിങ്കളാഴ്ച രാത്രിയുണ്ടായ അപകടത്തിലാണ് നാലു സൈനികര്‍ മരിച്ചത്. ഒരു സൈനികനെ രക്ഷപ്പെടുത്തി ആശുപത്രിയില്‍ പ്രവേശിപ്പിച്ചിട്ടുണ്ട്.
ശ്രീനഗര്‍: ജമ്മു കശ്മിരിലെ കുപ്‌വാര മേഖലയിലുണ്ടായ ഹിമപാതത്തില്‍ നാലു സൈനികരടക്കം പത്തുപേര്‍ മരിച്ചു. മാച്ചിലില്‍ തിങ്കളാഴ്ച രാത്രിയുണ്ടായ അപകടത്തിലാണ് നാലു സൈനികര്‍ മരിച്ചത്. പരുക്കേറ്റ ഒരു സൈനികനെ രക്ഷപ്പെടുത്തി ആശുപത്രിയില്‍ പ്രവേശിപ്പിച്ചിട്ടുണ്ട്. സംഭവമുണ്ടായ ഉടന്‍തന്നെ രക്ഷാപ്രവര്‍ത്തനം ആരംഭിച്ചെന്നും കുടുങ്ങിക്കിടന്ന അഞ്ചുപേരെയും പുറത്തെടുത്തുവെന്നും വ്യക്തമാക്കിയ കുപ്‌വാര പൊലിസ് സൂപ്രണ്ട് ശ്രീറാം അംബര്‍കര്‍, എന്നാല്‍ നാലുപേര്‍ മരിച്ചിരുന്നുവെന്നും അറിയിച്ചു. ഗണ്ടര്‍ബാല്‍ ജില്ലയിലെ സോണ്‍മാര്‍ഗിലുണ്ടായ മറ്റൊരു ഹിമപാതത്തില്‍ കുടുങ്ങിയ ഒന്‍പതു പ്രദേശവാസികളില്‍ അഞ്ചുപേര്‍ മരിച്ചു. നാലുപേരെ രക്ഷപ്പെടുത്തി.
അതേസമയം, നിയന്ത്രണരേഖയില്‍ നൗഗാം സെക്ടറിലുണ്ടായ അപകടത്തില്‍ ഒരു ബി.എസ്.എഫ് കോണ്‍സ്റ്റബിളും മരിച്ചിട്ടുണ്ട്. ഇവിടെ ആറുപേരെ രക്ഷപ്പെടുത്തിയിട്ടുണ്ട്. വടക്കന്‍ കശ്മിരില്‍ ദിവസങ്ങളായി ശക്തമായ മഞ്ഞുവീഴ്ചയാണ് അനുഭവപ്പെടുന്നത്.