തൃശൂര്‍: പൗരത്വ നിയമ ഭേദഗതിക്കെതിരേ പ്രതിഷേധ പ്രകടനം നടത്തിയ എസ്.കെ.എസ്.എസ്.എഫ് തൃശൂര്‍ ജില്ലാ ഭാരവാഹികള്‍ക്കെതിരേ ചുമത്തിയത് ഐ.പി.സി 147 ഉള്‍പ്പെടെ വിവിധ വകുപ്പുകള്‍ . ഡിസംബര്‍ 16ന് നടത്തിയ പ്രതിഷേധ പ്രകടനമാണ് കേസിനാധാരം. തൃശൂര്‍ ശക്തന്‍ നഗറില്‍ നിന്നാരംഭിച്ച പ്രതിഷേധ റാലി റെയില്‍വേ സ്റ്റേഷനു സമീപം കോണ്‍ഗ്രസ് നേതാവും മുന്‍ എം.എല്‍.എയുമായ പി.എ മാധവന്‍ ആണ് ഉദ്ഘാടനം ചെയ്തത്. മുസ്‌ലിം ലീഗ് സംസ്ഥാന സെക്രട്ടറി കെ.എസ് ഹംസയാണ് മുഖ്യപ്രഭാഷണം നടത്തിയത്. കെ.എസ് ഹംസ ഉള്‍പ്പടെയുള്ള പത്തു പേര്‍ക്കെതിരേയും സമാനവകുപ്പുകള്‍ ചുമത്തിയിട്ടുണ്ട്.
എസ്.കെ.എസ്.എസ്.എഫ് ജില്ലാ പ്രസിഡന്റ് മഹ്‌റൂഫ് വാഫി, ജനറല്‍ സെക്രട്ടറി അഡ്വ.അബൂബക്കര്‍ സിദ്ദീഖ് അല്‍മാലികി, എസ്.കെ.എസ്.എസ്.എഫ് സംസ്ഥാന പ്രവര്‍ത്തക സമിതി അംഗം ഷെഹീര്‍ ദേശമംഗലം, ജില്ലാ വര്‍ക്കിങ് സെക്രട്ടറി ഷാഹുല്‍ പഴുന്നാന, ഇബ്രാഹിം ഫൈസി പഴുന്നാന, സിദ്ദീഖ് ഫൈസി മങ്കര, സി.എ ശംസുദ്ദീന്‍, സി.എ ഹനീഫ, മുഹ്‌യുദ്ദീന്‍ മുള്ളൂര്‍ക്കര തുടങ്ങിയവര്‍ക്കെതിരേയാണ് കേസെടുത്തിരിക്കുന്നത്. മാര്‍ച്ച് തുടങ്ങുന്നതിന് ദിവസങ്ങള്‍ക്ക് മുന്‍പ് നെടുപുഴ പൊലിസ് സ്റ്റേഷനിലും ഈസ്റ്റ് പൊലിസ് സ്റ്റേഷനിലും നേതാക്കള്‍ അനുമതി തേടിയിരുന്നു.